തിരുവനന്തപുരം: കോഴിക്കോട് – ബെംഗളൂരു റൂട്ടിൽ സർവ്വീസ് തുടങ്ങാനിരിക്കുന്ന നവകേരള ബസ് ടിക്കറ്റ് വൻ ഡിമാന്റ്. ഞായറാഴ്ച മുതൽ ആണ് സർവീസ്. ബുധനാഴ്ച ബുക്കിംഗ് ആരംഭിച്ചപ്പോൾ മണിക്കൂറുകൾക്കകം ആണ് ആദ്യ സർവീസിന്റെ ടിക്കറ്റ് മുഴുവൻ വിറ്റ് പോയത്. ആധുനിക സൗകര്യങ്ങളോട് കൂടിയ ബസ് ഗരുഡ പ്രീമിയം എന്ന പേരിലാണ് അന്തർ സംസ്ഥാന സർവീസ് നടത്തുന്നത്.
ബുധനാഴ്ച കോഴിക്കോട്ടേക്ക് ബസ് എത്തിക്കാനുള്ള യാത്ര തിരുവനന്തപുരം – കോഴിക്കോട് സർവസായി മാറി. ബുക്ക് ചെയ്ത 9 യാത്രക്കാരാണ് ബസ് പുറപ്പെട്ട തമ്പാനൂർ ടെർമിനലിൽ നിന്നുള്ള യാത്രക്കാരായത്. വഴിയിൽ നിന്നും യാത്രക്കാർ കയറി. എയർ കണ്ടീഷൻ ചെയ്ത ബസ്സിൽ 26 പുഷ് ബാക്ക് സീറ്റുകൾ ആണുള്ളത്. ഫുട് ബോർഡ് ഉപയോഗിക്കാൻ കഴിയാത്ത ഭിന്നശേഷിക്കാർ, മുതിർന്ന പൗരന്മാർ തുടങ്ങിയവർക്ക് ബസിനുള്ളിൽ കയറാൻ ഹൈഡ്രോളിക്ക് ലിഫ്റ്റുണ്ട്, ടെലിവിഷൻ, മ്യൂസ്ക് സിസ്റ്റം, മാെബൈൽ ചാർജർ എന്നീ സൗകര്യങ്ങളും ഉണ്ട്. ബസ്സിന്റെ നിറത്തിലും ബോഡിയിലും മാറ്റങ്ങളില്ല. മുഖ്യമന്ത്രിക്ക് ഇരിക്കാൻ ഒരുക്കിയ ചെയർ ഡബിൾ സീറ്റാക്കി. യാത്രക്കാർക്ക് ലഗേജ് സൂക്ഷിക്കാനായി സൗകര്യമുണ്ട്.
എല്ലാ ദിവസം പുലർച്ചെ നാലിന് കോഴിക്കോട് നിന്ന് യാത്ര തിരിച്ച് 11. 35 ന് ബെംഗളൂരുവിലെത്തും. പകൽ 2. 30 ന് ബെംഗളൂരുവിൽ നിന്ന് തിരിച്ച് രാത്രി 10. 5 ന് കോഴിക്കോട് എത്തും. 1,171 രൂപയാണ് സെസ് അടക്കമുള്ള ടിക്കറ്റ് നിരക്ക്. എ സി ബസ്സുകൾക്കുള്ള അഞ്ച് ശതമാനം ആഡംബര നികുതിയും ഉണ്ട്.
