അമീബിക് മസ്തിഷ്ക ജ്വരം ബാധിച്ച് സംസ്ഥാനത്ത് വീണ്ടും മരണം

കോഴിക്കോട്: അമീബിക് മസ്തിഷ്ക ജ്വരം ബാധിച്ച് സംസ്ഥാനത്ത് വീണ്ടും മരണം. കോഴിക്കോട് ബേബി മെമ്മോറിയൽ ആശുപത്രിയിൽ ചികിത്സയിലായിരുന്ന പതിമൂന്ന് വയസുകാരിയാണ് മരിച്ചത്. കണ്ണൂർ സ്വദേശി രാ​ഗേഷ് ബാബുവിന്റെയും ധന്യ രാ​ഗേഷിന്റെയും മകൾ ദക്ഷിണ (13) ആണ് മരിച്ചത്. ഈ മാസം 12ന് ആണ് കുട്ടിയെ ചികിത്സയിൽ പ്രവേശിപ്പിച്ചത്. തലവേദനയും ഛർദ്ദിയും ബാധിച്ച കുട്ടിയെ ആദ്യം കണ്ണൂർ ചാലയിലെ സ്വകാര്യ ആശുപത്രിയിലാണ് പ്രവേശിപ്പിച്ചത്. ആരോ​ഗ്യസ്ഥിതി വഷളായതിനെ തുടർന്നാണ് കോഴിക്കോട്ടേക്ക് മാറ്റിയത്. സ്കൂളിൽ നിന്ന് മൂന്നാറിലേക്ക് വിനോദയാത്ര പോയിരുന്നു. ഈ സമയത്ത് കുട്ടി പൂളിൽ കുളിച്ചിരുന്നു. ഇവിടെ നിന്നാകാം രോ​ഗബാധയേറ്റതെന്നാണ് പ്രാഥമിക നി​ഗമനം.