2024ൽ രാഹുൽ ​ഗാന്ധി നയിക്കുന്ന കേന്ദ്ര സർക്കാർ അധികാരത്തിൽ വരും: ഖാർ​ഗെ

ഹൈദരാബാദ്: കന്യാകുമാരി മുതൽ കശ്മീർ വരെ പടയോട്ടോത്തിനു സജ്ജമായ ഒരു പ്രസ്ഥാനം സർവസജ്ജമായി മുന്നേറുമ്പോൾ പ്രതിപക്ഷ കക്ഷികളുടെ കൂട്ടായ സഖ്യമാണു രൂപപ്പെടേണ്ടതെന്ന് കോൺ​ഗ്രസ് അധ്യക്ഷൻ മല്ലികാർജുൻ ഖാർ​ഗെ. 2024ലെ പൊതുതെരഞ്ഞെടുപ്പിൽ ബിജെപി വിരുദ്ധ സർക്കാർ വരും. അതിനു കോൺ​ഗ്രസ് നേതാവ് രാഹുൽ ​ഗാന്ധി നേതൃത്വം നൽകുമെന്നും ഖാർ​ഗെ പറഞ്ഞു. രാഹുൽ ​ഗാന്ധി നയിക്കുന്ന ഭാരത് ജോഡോ യാത്രയിൽ പങ്കെടുത്ത് ഹൈദരാബാദിൽ കൂടിയ പൊതു സമ്മേളനത്തിൽ പ്രസം​ഗിക്കുകയായിരുന്നു അദ്ദേഹം. പാർട്ടി അധ്യക്ഷനായ ശേഷം ഖാർ​ഗെയുടെ ആദ്യത്തെ പൊതു സമ്മേളനമായിരുന്നു ഇത്. ആയിരങ്ങൾ പങ്കെടുത്ത സമ്മേളനത്തെ ആവേശഭരിതരാക്കി, ഖാർ​ഗെ നരന്ദ്രമോദിക്കും തെലുങ്കാന മുഖ്യമന്ത്രിയുടെ ഇരട്ടത്താപ്പിനുമെതിരേ ആഞ്ഞടിച്ചു.
രാജ്യത്തിന്റെ സമസ്ത മേഖലയെയും നരേന്ദ്ര മോദി തകർത്തു. 70 വർഷം കോൺ​ഗ്രസ് ഭരണത്തിൽ രാജ്യം കൈവരിച്ച മുഴുവൻ വികസനങ്ങളും മോദി അട്ടിമറിച്ചു. പണ്ഡിറ്റ് ജവഹർലാൽ നെഹറു സ്ഥാപിച്ച അതിശക്തമായ അടിത്തറയിലാണ് ഇന്ത്യയുടെ ജനാധിപത്യം. ഇക്കാലമത്രയും കോൺ​ഗ്രസ് സർക്കാരുകൾ സുരക്ഷിതമായി സംരക്ഷിക്കുകയും ശക്തിപ്പെടുത്തുകയും ചെയ്തതു കൊണ്ടാണ് മോദിക്ക് ഇന്ന് ഇവിടെയിരുന്ന് ഭരിക്കാൻ കഴിയുന്നത്. എന്നാൽ ജനാധിപത്യത്തിന്റെയും മതേതരത്വത്തിന്റെയും പാരമ്പര്യങ്ങൾ തകർക്കാനാണ് അദ്ദേഹം ശ്രമിക്കുന്നത്. അതൊരിക്കലും കോൺ​ഗ്രസ് പാർട്ടി അനുവദിച്ചു കൊടുക്കില്ല. കന്യാകുമാരി മുതൽ കശ്മീർ വരെയും​ ​ഗുജറാത്ത് മുതൽ അസം വരെയുമുള്ള ജനങ്ങളെ ശക്തിപ്പെടുത്തി കോൺ​ഗ്രസ് അധികാരത്തിൽ വരും. അതിന്റെ പടയോട്ടമാണ് ഭാരത് ജോഡോ യാത്രയെന്നും ഖാർ​ഗെ പറഞ്ഞു.
ഹിമാചൽ പ്രദേശിനൊപ്പെ തെരഞ്ഞെടുപ്പ് നടക്കേണ്ട സംസ്ഥാനമാണു ​ഗുജറാത്ത്. ഹിമാചലിൽ തെരഞ്ഞെടുപ്പ് തീയതി പ്രഖ്യാപിച്ചു. ​ഗുജറാത്തിൽ അതു നീളുന്നു. മോർബിയിലെപ്പോലെ ഇനിയും കൂടുതൽ പാലങ്ങൾ തുറന്ന് ജനങ്ങളുടെ ജീവൻ അകടത്തിലാക്കി, വികസന നേട്ടം വിവരിക്കാനാണ് ഈ വച്ചു നീട്ടലെന്നും ഖാർ​ഗെ പരിഹസിച്ചു.
ജനങ്ങളുടെ കണ്ണിൽ പൊടിയിട്ട് തെലുങ്കാനയിലെ ജനങ്ങളെ വഞ്ചിക്കുകയാണ് നിങ്ങളുടെ മുഖ്യമന്ത്രി കെ. ചന്ദ്രശേഖര റാവു ചെയ്യുന്നതെന്ന് ചടങ്ങിൽ പ്രസം​ഗിച്ച രാഹുൽ ​ഗാന്ധി കുറ്റപ്പെടുത്തി. കോൺ​ഗ്രസ് ഇല്ലാത്ത പ്രതിപക്ഷം തട്ടിക്കൂട്ടാനാണ് റാവു ശ്രമിക്കുന്നത്. പാർലമെന്റിൽ
വിവാദമായ കർഷക ദ്രോഹ ബില്ലുകൾ വരെ അനുകൂലിച്ച ശേഷം പുറത്ത് ബിജെപി വിരുദ്ധത പ്രസം​ഗിക്കുകയാണ് റാവു. കേന്ദ്ര സർക്കാരിന്റെ മുഴുവൻ നയങ്ങളെയും പിന്തുണച്ച ശേഷം പുറത്ത് ബിജെപി വുരുദ്ധത പറയുന്നത് ഇരട്ടത്താപ്പാണെന്നും രാഹുൽ ​ഗാന്ധി പറഞ്ഞു.
കോൺ​ഗ്രസ് അധ്യക്ഷനായി തെരഞ്ഞെടുക്കപ്പെട്ട ശേഷമുള്ള ആദ്യ പൊതു പരിപാടിയിൽ ഖാർ​ഗെയ്ക്ക് ആവേശ പൂർവമായ സ്വകീരണമാണ് ലഭിച്ചത്. നിലയ്ക്കാത്ത കൈയടിയും ജെയ് വിളിയും കൊണ്ട് പ്രവർത്തകർ അദ്ദേഹത്തിന്റെ പ്രസം​ഗം പ്രോത്സാഹിപ്പിച്ചുകൊണ്ടിരുന്നു. ഇന്നലെ ഉച്ച കഴിഞ്ഞു ഹൈദരാബാദിലെത്തിയ അദ്ദേഹം നെക്ക്ലെസ് റോഡിൽ ഇന്ദിരാ ​ഗാന്ധി പ്രതിമയ്ക്കു മുന്നിൽ രാഹുലിനൊപ്പം ദേശീയ പതാക ഉയര്ത്തി.