ഹരാരെ: അവസാന നിമിഷം വരെ ആരാധകരെ മുൾമുനയിൽ നിർത്തി സിക്കന്ദര്‍ റാസയുടെ ഒറ്റയാള്‍ പോരാട്ടത്തിലൂടെ ഇന്ത്യയെ വിറപ്പിച്ച സിബാബ്വെ ഒടുവില്‍ കിഴടങ്ങി. ഏകദിന പരമ്പരയിലെ മൂന്നാം മത്സരത്തില്‍ 13 റണ്‍സിന്‍റെ നേരിയ ജയവുമായി ഇന്ത്യ ഏകദിന പരമ്പര 3-0ന് തൂത്തുവാരി. ഇന്ത്യ ഉയര്‍ത്തിയ 290 റണ്‍സിന്‍റെ വിജയലക്ഷ്യം പിന്തുടര്‍ന്ന സിംബാബ്വെ 49-ാം ഓവര്‍ വരെ വിജയപ്രതീക്ഷയിലായിരുന്നെങ്കിലും 49-ാം ഓവറിലെ നാലാം പന്തില്‍ റാസയെ(95 പന്തില്‍ 15) ഷര്‍ദ്ദുല്‍ ഠാക്കൂറിന്‍റെ പന്തില്‍ ശുഭ്മാന്‍ ഗില്‍ പറന്നുപിടിച്ചാണ് ഇന്ത്യക്ക് വിജയം ഉറപ്പിച്ചത്. ഏഴാം വിക്കറ്റില്‍ ബ്രാഡ് ഇവാന്‍സിനൊപ്പം 103 റണ്‍സിന്‍റെ കൂട്ടുകെട്ടുയര്‍ത്തിയാണ് റാസ സിംബാബ്വെക്ക് വിജയപ്രതീക്ഷ നല്‍കിയത്. 87 പന്തില്‍ സെഞ്ചുറിയിലെത്തിയ റാസ 95 പന്തില്‍ 115 റണ്‍സുമായി മടങ്ങി. സ്കോര്‍ ഇന്ത്യ 50 ഓവറില്‍ 289-8. സിംബാബ്വെ 49.3 ഓവറില്‍ 276ന് ഓള്‍ ഔട്ട്.
അവസാന നാലോവറില്‍ 40 റണ്‍സും രണ്ടോവറില്‍ 17 റണ്‍സുമായിരുന്നു സിംബാബ്‌വെയ്ക്ക് ജയിക്കാന്‍ വേണ്ടിയിരുന്നത്. ആവേശ് ഖാന്‍ എറിഞ്ഞ 48-ാം ഓവറില്‍ 16 റണ്‍സടിച്ചാണ് റാസ ഇന്ത്യയെ വിറപ്പിച്ചത്. ആ ഓവറിലെ അവസാന പന്തില്‍ ബ്രാഡ് ഇവാന്‍സ് പുറത്തായത് ഇന്ത്യക്ക് ആശ്വാസമായി. ഷര്‍ദ്ദുല്‍ ഠാക്കൂര്‍ എറിഞ്ഞ അടുത്ത ഓവറില്‍ റാസ പുറത്തായോതോടെ സിംബാബ്‌വെയ്ക്ക് രണ്ട് റണ്‍സ് മാത്രമെ നേടാനായുള്ളു. അവാസന ഓവറില്‍ 15 റണ്‍സായിരുന്നു സിംബാബ്‌വെയ്ക്ക് ജയിക്കാന്‍ വേണ്ടിയിരുന്നത്. മൂന്നാം പന്തില്‍ ന്യൗച്ചിയെ ക്ലീന്‍ ബൗള്‍ഡാക്കി ആവേശ് ഖാന്‍ ഇന്ത്യക്ക് വിജയം സമ്മാനിച്ചു.
290 റണ്‍സിന്‍റെ കൂറ്റന്‍ വിജയലക്ഷ്യം പിന്തുടര്‍ന്നിറങ്ങിയ സിംബാബ്‌വെയ്ക്ക് തുടക്കത്തിലെ തിരിച്ചടിയേറ്റു. ആറ് റണ്‍സെടുത്ത ഓപ്പണര്‍ ഇന്നസെന്‍റ് കൈയയെ ദീപക് ചാഹര്‍ മൂന്നാം ഓവറില്‍ മടക്കി. തൊട്ടുപിന്നാലെ മറ്റൊരു ഓപ്പണറായ കെയ്റ്റാനോ പരുക്കേറ്റ് മടങ്ങി. സീന്‍ വില്യംസും ടോണി മുന്യോംഗയും ചേര്‍ന്ന് അര്‍ധസെഞ്ചുറി കൂട്ടുകെട്ടുയര്‍ത്തി സിംബാബ്‌വെയ്ക്ക് പ്രതീക്ഷ നല്‍കി. മുന്യോംഗയെ ആവേശ് ഖാന്‍ വീഴ്ത്തി കൂട്ടുകെട്ട് പൊളിച്ചു.
