സംസ്ഥാനത്ത് ചില ജില്ലകളില് ഹാന്ഡ്-ഫൂട്ട്-മൗത്ത് ഡിസീസ് (എച്ച്.എഫ്.എം.ഡി.) അഥവാ തക്കാളി പനി റിപ്പോര്ട്ട് ചെയ്യുന്നെങ്കിലും ആശങ്ക വേണ്ടെന്ന് ആരോഗ്യ മന്ത്രി വീണ ജോർജ്. ഒരുജില്ലയില് പോലും ഈ രോഗം വലിയ തോതില് വര്ധിച്ചിട്ടില്ല. ആരും തന്നെ ഗുരുതാവസ്ഥയില് എത്തിയതായും റിപ്പോര്ട്ട് ചെയ്തിട്ടില്ലെന്ന് മന്ത്രി വ്യക്തമാക്കി. ഈ രോഗത്തിന് അപകട സാധ്യത കുറവാണെങ്കിലും അപൂര്വമായി മസ്തിഷ്ക ജ്വരത്തിന് കാരണമായേക്കാം.
അഞ്ചുവയസില് താഴെയുള്ള കുട്ടികളെയാണ് ഈ രോഗം കൂടുതലായും ബാധിക്കുന്നതിനാല് ഏറെ ശ്രദ്ധ വേണമെന്ന് മന്ത്രി അറിയിച്ചു. രോഗലക്ഷണങ്ങള് കണ്ടാല് ഉടന് ഡോക്ടറുടെ സേവനം തേടേണ്ടതാണ്. കുഞ്ഞുങ്ങള്ക്ക് ഇടയ്ക്കിടയ്ക്ക് കുടിക്കാന് ധാരാളം വെള്ളം കൊടുക്കണം. മറ്റ് കുട്ടികള്ക്ക് ഈ രോഗം പകരാതെ ശ്രദ്ധിക്കുകയും വേണമെന്ന് മന്ത്രി വ്യക്തമാക്കിയിട്ടുണ്ട്.