തിരുവനന്തപുരം:പ്രതിഭാശാലിയായ നടൻ ഇന്നസെന്റിന്റെ വേർപാടിൽ സിപിഐ എം സംസ്ഥാന സെക്രട്ടറി എം വി ഗോവിന്ദൻ അനുശോചിച്ചു. ഒരേസമയം ഹാസ്യനടനായും സ്വഭാവനടനായും തിളങ്ങിയ താരമാണ് ഇന്നസന്റ്. സിനിമയിൽ മാത്രമല്ല, ടെലിവിഷൻ ചാനലുകളിലും എഴുത്തിലും ഇന്നസെന്റ് തന്റേതായ ഇടം കണ്ടെത്തി. മലയാള സിനിമയുടെതന്നെ വഴിത്തിരിവായ കഥാപാത്രങ്ങൾക്ക് ജീവൻ നൽകി ചരിത്രത്തിലും ഇടംനേടി.
കലയോടും ഒപ്പം നാടിനോടും എന്നും പ്രതിബദ്ധത പുലർത്തിയിരുന്നു അദ്ദേഹം. കൃത്യമായ രാഷ്ട്രീയ നിലപാട് ഉയർത്തിപ്പിടിച്ച അദ്ദേഹം എൽ ഡി എഫ് പാർലമെന്റ് അംഗം എന്ന നിലയിൽ മികച്ച പ്രവർത്തനമാണ് കാഴ്ചവച്ചത്. സിനിമയിൽ തിരക്കുള്ളപ്പോഴും തന്റെ രാഷ്ട്രീയദൗത്യം നിറവേറ്റുന്നതിൽ ശ്രദ്ധ പതിപ്പിച്ചിരുന്നു.