അഹിംസയ്ക്കും സത്യത്തിനും നേരേ ഉയരുന്ന വെല്ലുവിളി ചെറുക്കും: രാഹുൽ ​ഗാന്ധി

മൈസൂരു: നമ്മുടെ പൂർവസൂരികളായ നേതാക്കൾ നേടിയ രാഷ്‌ട്രീയ സ്വാതന്ത്ര്യം കടുത്ത വെല്ലുവിളി നേരിടുകയാണെന്ന് രാഹുൽ ​ഗാന്ധി. ഭാരത് ജോഡോ യാത്രയുടെ 25ാം ദിവസമായ ഇന്ന് ​ഗാന്ധി ​ഗ്രാമമായ ബദനുവാലു സന്ദർശിച്ച ശേഷം ന‌ടത്തിയ പ്രസ്താവനയിലാണ് അദ്ദഹം ഇക്കാര്യം ഓർമിപ്പിച്ചത്. രാജ്യം നേടിയെടുത്ത സ്വാതന്ത്ര്യത്തിന്റെ സത്ത കഴിഞ്ഞ എട്ടു വർഷമായി ചോർന്നു പോയിരിക്കുന്നു. അഹിംസയും ഏകത്വവും തുല്യതയുമാണ് ​ഗാന്ധിജിയിലൂടെ നാം നേടിയെടുത്ത നേട്ടങ്ങൾ. ഇന്ത്യയടെ എക്കാലത്തെയും മഹാനായ പുത്രന്റെ 153ാം ജന്മദിനമാണിന്ന്. ഈ ദിനത്തിൽ ​ഗാന്ധിസത്തെത്തന്നെ ഇല്ലാതാക്കിയ ആശയ​ഗതികൾക്കെതിരേയാണ് നമ്മുടെ പോരാ‌‌ട്ടം. എന്തു വില കൊടുത്തും അഹിംസയും സത്യസന്ധതയും ഐക്യവും നിലനിർത്തുമെന്ന് പ്രതിജ്ഞ എടുക്കണമെന്നും അദ്ദേഹം ആവശ്യപ്പെട്ടു. കന്യാകുമാരി മുതൽ കശ്മീർ വരെ നീളുന്ന ഭാരത് ജോ‍ഡോ യാത്ര മുന്നോട്ടു വയ്ക്കുന്ന സന്ദേശവും ഇതു തന്നെയെന്നും അദ്ദേഹം വ്യക്തമാക്കി.