വ്യാജപരസ്യങ്ങളോടൊപ്പം പ്രതിവർഷ 70 കോടി ഡോളർ വരുമാനം; മെറ്റ ഉപയോക്താക്കളെ വഞ്ചിച്ചെന്ന് റിപ്പോർട്ട്.

06|08|2026

Sabu Joseph

പ്രധാനമന്ത്രി നരേന്ദ്ര മോദിയുടെ വീഡിയോ താൽക്കാലികമായി നീക്കം ചെയ്ത സംഭവത്തിൽ വിവാദം പുകയുന്നതിനിടെ പ്രത്യേക തരം കണ്ടന്റ് ആളുകളിലേക്ക് എത്തിക്കാൻ പണം കൈപ്പറ്റിയതായി കേന്ദ്ര സർക്കാരിന് മുന്നിൽ സമ്മതിച്ച് സോഷ്യൽ മീഡിയ ഭീമനായ മെറ്റ. ഡീപ്ഫേക്ക് ദൃശ്യങ്ങൾ , കുട്ടികൾക്കെതിരായ ലൈംഗികാതിക്രമ ദൃശ്യങ്ങൾ, പ്രവർത്തനപരമായ വീഴ്ചകൾ എന്നിവയിൽ മെറ്റ സി.ഇ.ഒ മാർക്ക് സക്കർബർഗ് കേന്ദ്രത്തിന് മുന്നിൽ ഖേദം പ്രകടിപ്പിച്ചതായി റിപ്പോർട്ടുകൾ വ്യക്തമാക്കുന്നു. ഓഗസ്റ്റ് 5 ബുധനാഴ്ച കേന്ദ്ര ഐ.ടി മന്ത്രി അശ്വിനി വൈഷ്ണവുമായി നടന്ന ഉന്നതതല യോഗത്തിലാണ് മെറ്റയുടെ ആഗോള പ്രതിനിധി സംഘം നിർണായക വെളിപ്പെടുത്തലുകൾ നടത്തിയത്. ഡൽഹി ജന്തർ മന്തറിൽ നടന്ന പ്രതിഷേധങ്ങൾക്കിടെ പ്രധാനമന്ത്രി നരേന്ദ്ര മോദി പങ്കുവെച്ച വീഡിയോ ഫെയ്‌സ്ബുക്ക് താൽക്കാലികമായി നീക്കം ചെയ്തതിനെത്തുടർന്ന് കേന്ദ്ര സർക്കാർ മെറ്റ സംഘത്തെ വിളിച്ചുവരുത്തുകയായിരുന്നു. വ്യാജ നിക്ഷേപ പദ്ധതികൾ, ഇ-കൊമേഴ്‌സ് തട്ടിപ്പുകൾ, നിരോധിത ഉൽപ്പന്നങ്ങളുടെ വിൽപ്പന എന്നിവ പ്രോത്സാഹിപ്പിക്കുന്ന പരസ്യങ്ങൾ വഴി മെറ്റ പ്രതിവർഷം 7 ശതകോടി ഡോളറോളം വരുമാനമുണ്ടാക്കുന്നുണ്ടെന്ന് 2025 നവംബറിൽ റോയിട്ടേഴ്സ് പുറത്തുവിട്ട ആഗോള റിപ്പോർട്ടുകൾ ചൂണ്ടിക്കാണിക്കുന്നു. ദിവസേന 1,500 കോടി അപകടകരമായ വ്യാജ പരസ്യങ്ങൾ കമ്പനി ഉപയോക്താക്കളിലേക്ക് എത്തിക്കുന്നതായും രേഖകൾ വ്യക്തമാക്കുന്നു.