ഒന്നാം ക്ലാസ്സ്കാരിയോട് ക്രൂരത; വേഗത്തിൽ എഴുതാത്തതിന് അധ്യാപികയുടെ മർദ്ദനം

July 15, 2026

Althaf ML

കടയ്ക്കാവൂർ: ഹോംവർക്ക് എഴുതാത്തതിന്റെ പേരിൽ ഒന്നാം ക്ലാസ് വിദ്യാർത്ഥിനിയെ അധ്യാപിക മർദിച്ചതായി പരാതി. സംഭവത്തിൽ കുട്ടിയുടെ വലത് കൈയിലെ വിരലിന് പരിക്കേറ്റതിനെ തുടർന്ന് വർക്കല താലൂക്ക് ആശുപത്രിയിലും പിന്നീട് സ്വകാര്യ മെഡിക്കൽ കോളേജിലും ചികിത്സ തേടി. കഴിഞ്ഞ വ്യാഴാഴ്ച നടന്ന സംഭവത്തെക്കുറിച്ച് കുട്ടി ആദ്യം മാതാപിതാക്കളോട് ഒന്നും പറഞ്ഞിരുന്നില്ല. എന്നാൽ അടുത്ത ദിവസം കുട്ടി കൈ മുറുക്കിപ്പിടിക്കുന്നതും വിരലിൽ വീക്കം കാണപ്പെട്ടതും ശ്രദ്ധയിൽപ്പെട്ടതോടെ മാതാവ് വിവരങ്ങൾ അന്വേഷിക്കുകയായിരുന്നു. തുടർന്ന് കുട്ടിക്ക് പനിയും അനുഭവപ്പെട്ടു. ആശുപത്രി പരിശോധനയിൽ വിരലിലെ ലിഗമെന്റിന് പരിക്കേറ്റതായി കണ്ടെത്തി. നിലവിൽ കുട്ടിയുടെ കൈ പ്ലാസ്റ്റർ ഇട്ട നിലയിലാണ്. സംഭവത്തിൽ രക്ഷിതാക്കൾ കടയ്ക്കാവൂർ പൊലീസ്, ശിശുക്ഷേമ വകുപ്പ്, സ്കൂൾ അധികൃതർ എന്നിവർക്കു പരാതി നൽകിയിട്ടുണ്ട്. പരാതിയുടെ അടിസ്ഥാനത്തിൽ തുടർനടപടികൾ സ്വീകരിക്കുമെന്ന് ബന്ധപ്പെട്ട അധികൃതർ അറിയിച്ചു.