കൊടുവള്ളിക്കാരിൽ ഒരാളായി ജീവിച്ച പളനി സ്വാമി തിരികെവരാൻ കഴിയുമെന്ന ഉറപ്പില്ലാതെ തിരികെ നാട്ടിലേക്ക്

29/06/2026

PRAKASH

കൊടുവള്ളി 26 വർഷമായി കൊടുവള്ളിക്കാരിൽ ഒരാളായി ജീവിച്ച തമിഴ്‌നാട് സേലം സ്വദേശി പളനി സ്വാമി കഴിഞ്ഞ ദിവസം നാട്ടിലേക്ക് തിരിച്ചത് ഉള്ളുരുകുന്ന വേദനയോടെ തൻ്റെ ജീവിതം തിരികെപിടിക്കാൻ ഒപ്പം നിന്ന കൊടുവള്ളിയിലേക്ക് ഇനി തിരികെവരാൻ കഴിയുമെന്ന ഉറപ്പില്ലാതെയായിരുന്നു ആ യാത്ര. കൊടുവള്ളി -കിഴക്കോത്ത് റോഡിൽ പൂളപ്പൊരിക്കച്ചവടം നടത്തിയിരുന്ന പളനിസ്വാമിക്ക് ആ ഉന്തുവണ്ടിക്കച്ചവടം നിർത്തേണ്ടിവന്നു.കൊടുവള്ളി ടൗണിലെ ഗതാഗതക്കുരുക്ക് പരിഹരിക്കാൻ കിഴക്കോത്ത് റോഡിന്റെ തുടക്കത്തിലുള്ള മൂന്നു വൻ മരങ്ങൾ മുറിച്ചുമാറ്റി ആ ഭാഗത്ത് റോഡ് വീതി കൂട്ടുന്നതിന്റെ ഭാഗമായി നഗരസഭാധികൃതർ പളനിസ്വാമിയുടെ വഴിയോരക്കച്ചവടം അവിടെനിന്നു മാറ്റാനാവശ്യപ്പെടുകയായിരുന്നു. തുടർന്ന് സമീപത്ത് അടുത്ത ദിവസം തന്നെ കച്ചവടം തുടങ്ങിയെങ്കിലും ബസുകളുടെ സ്റ്റോപ് അവിടേക്ക് ക്രമീകരിച്ചതിനാൽ ആ സ്‌ഥലവും ഒഴിയേണ്ടിവന്നു.