ഒന്നര വയസ്സുകാരനെ കൊലപ്പെടുത്തിയ കേസിൽ പ്രതികളെ കസ്‌റ്റഡിയിൽ വാങ്ങും

05/06/2026

PRAKASH

നെടുമങ്ങാട് : പനവൂരിലെ ഒന്നര വയസ്സുകാരനെ കൊലപ്പെടുത്തിയ കേസിൽ റിമാൻഡിലുള്ള രണ്ടാനച്ഛൻ അഷ്കറിനെയും കുഞ്ഞിൻ്റെ അമ്മ അഖിലയേയും പൊലീസ് വെള്ളിയാഴ്‌ച കസ്‌റ്റഡിയിൽ വാങ്ങും. ഇതിനായി നെടുമങ്ങാട് എസ്‌സി/എസ്‌ടി കോടതിയിൽ അന്വേഷകസംഘം കഴിഞ്ഞദിവസം കസ്റ്റഡി അപേക്ഷ നൽകിയിരുന്നു. വെള്ളിയാഴ്‌ച ഓപ്പൺ കോടതി അപേക്ഷ പരിഗണിക്കും. കുഞ്ഞിൻ്റെ മരണത്തിൽ അഖിലയ്ക്കുള്ള പങ്ക് നേരത്തേ വ്യക്തമായിരുന്നെങ്കിലും തെളിവെടുപ്പ് നടത്തിയിരുന്നില്ല. പനവൂരിലെ വാടകവീട്ടിൽ അഷ്കറിനെയെത്തിച്ച് തെളിവെടുപ്പ് നടത്തുമ്പോൾ ജനരോഷം ഉണ്ടായതോടെ അഖിലയുടെ തെളിവെടുപ്പ് മറ്റൊരു ദിവസത്തേക്ക് മാറ്റുകയായിരുന്നു. കുഞ്ഞിനെ പീഡിപ്പിച്ച് കൊലപ്പെടുത്താൻ കൂട്ടുനിന്നെന്ന അഷ്കറിന്റെ മൊഴിക്കുപുറമെ അഷ്കറിൻ്റെ മാതാപിതാക്കളുടെ മൊഴിയും അഖിലയ്ക്കെതിരെയുണ്ട്.