റാണിക്ക് മേക്കപ്പിട്ട് ഹാപ്പിയായി നടന്നാല്‍ മതി, ഉള്ളിലെ സംഘര്‍ഷം ജോര്‍ജുകുട്ടിക്ക് മാത്രമേ അറിയൂ: മോഹന്‍ലാല്‍

ഇന്ത്യൻ സിനിമയിൽ തന്നെ ഏറ്റവും കൂടുതൽ പ്രേക്ഷകർ കാത്തിരിക്കുന്ന ചിത്രമാണ് ദൃശ്യം 3. മലയാളത്തിൽ ആദ്യം പുറത്തിറങ്ങിയ ചിത്രം പിന്നീട് നിരവധി ഭാഷകളിലാണ് റീമേയ്ക്ക് ചെയ്ത് പുറത്തിറങ്ങിയത്. ദൃശ്യം 3 യ്ക്കായുള്ള കാത്തിരിപ്പിലാണ് ആരാധകർ. ചിത്രത്തിന്റെ പ്രൊമോഷനുമായി തിരക്കിലാണ് അണിയറപ്രവര്‍ത്തകര്‍. മെയ് 21 നാണ് സിനിമ പുറത്തിറങ്ങുന്നത്. സിനിമയിൽ റാണി എന്ന കഥാപാത്രത്തെയാണ് മീന അവതരിപ്പിക്കുന്നത്. റാണിയെക്കുറിച്ച് മോഹൻലാൽ പറഞ്ഞ വാക്കുകളാണ് ശ്രദ്ധ നേടുന്നത്. 'പൊലീസിന്റെ പിടിയില്‍ ജോര്‍ജ് കുട്ടി എപ്പോള്‍ വേണമെങ്കിലും അകപ്പെടാം. അതുകൊണ്ട് തന്നെ വളരെ സന്തോഷത്തോടെ ഇരിക്കുന്ന ജോര്‍ജ് കുട്ടിയല്ല ചിത്രത്തിലുള്ളത്. അകത്ത് ഭയങ്കരമായ സംഘര്‍ഷങ്ങള്‍ നടക്കുന്ന ആളു തന്നെയാണ് ജോര്‍ജ് കുട്ടി. ഈ ഭാര്യക്കും പിള്ളേര്‍ക്കും അതറിയില്ലെന്ന് പറഞ്ഞാല്‍ ഞാന്‍ എന്ത് ചെയ്യാനാണ്. ഈ റാണിക്ക് എപ്പോഴും മേക്കപ്പെല്ലാം ചെയ്ത് ഹാപ്പിയായി നടന്നാല്‍ മതി. ആ വീടിന് പോലും അയാള്‍ ഒരു മാറ്റവും വരുത്തിയിട്ടില്ല. കാരണം എപ്പോള്‍ വേണമെങ്കിലും അകത്ത് പോകാം. പെയിന്റെല്ലാം ചെയ്ത് പൈസ വെറുതെ കളയേണ്ട എന്ന് കരുതിയിട്ടാകും അതൊന്നും ചെയ്യാത്തത്,’ മോഹന്‍ലാല്‍ പറഞ്ഞു.