യുഎഇ സ്വർണവിപണി വന്‍ പ്രതിസന്ധിയില്‍: ആളുകള്‍ സ്വർണാഭരണങ്ങളോട് നോ പറയുന്നു; ലക്ഷ്യം വേറെ ഈ വർഷത്തെ ആദ്യ മൂന്ന് മാസങ്ങളിൽ യുഎഇയിലെ സ്വർണ്ണാഭരണ ഡിമാൻഡ് 40 ശതമാനം ഇടിഞ്ഞു

ദുബായ്: യുഎഇ സ്വർണ്ണ വിപണിയെ വൻ പ്രതിസന്ധിയിലേക്ക് തള്ളിവിട്ട് പശ്ചിമേഷ്യയിലെ സംഘർഷ സാഹചര്യങ്ങളും ആഗോള സാമ്പത്തിക അനിശ്ചിതത്വങ്ങളും. ഈ വർഷത്തെ ആദ്യ മൂന്ന് മാസങ്ങളിൽ യുഎഇയിലെ സ്വർണ്ണാഭരണ ഡിമാൻഡ് 40 ശതമാനം ഇടിഞ്ഞ് 4.7 ടണ്ണിലെത്തിയെന്നാണ് ഏറ്റവും പുതിയ റിപ്പോർട്ട്. ഇത് കഴിഞ്ഞ ആറ് വർഷത്തിനിടയിലെ ഏറ്റവും കുറഞ്ഞ നിരക്കാണ്. ഫെബ്രുവരി അവസാന വാരത്തിൽ അമേരിക്ക, ഇസ്രായേൽ, ഇറാൻ എന്നീ രാജ്യങ്ങൾക്കിടയിൽ ആരംഭിച്ച സൈനിക നീക്കങ്ങൾ മാർച്ചിലെ സ്വർണ്ണ വ്യാപാരത്തെ ഏറെക്കുറെ നിശ്ചലമാക്കുന്ന അവസ്ഥയിലേക്കും എത്തിച്ചു. സാധാരണഗതിയിൽ ടൂറിസം സീസണായ ഈ കാലയളവിൽ വിദേശ സഞ്ചാരികളിൽ നിന്ന് ലഭിക്കേണ്ട വലിയൊരു വരുമാനം യുദ്ധം മൂലം ഇല്ലാതായി. വിമാന ടിക്കറ്റ് നിരക്കിലെ വർദ്ധനവും യാത്രാ ഭീഷണികളും കാരണം ദുബായിലെ 'ഗോൾഡ് സൂഖ്' ഉൾപ്പെടെയുള്ള വിപണികളിൽ സന്ദർശകരുടെ എണ്ണത്തിൽ വലിയ കുറവാണ് രേഖപ്പെടുത്തിയത്.