പ്ലസ് വൺ സീറ്റ് പ്രതിസന്ധി; മലപ്പുറത്തെ സ്കൂളുകളിലെ രണ്ടംഗ കമ്മീഷന്റെ പരിശോധന ഇന്ന് പൂർത്തിയാവും

മലപ്പുറം: സംസ്ഥാനത്ത് നിലനിൽക്കുന്ന സീറ്റ് പ്രതിസന്ധി പഠിക്കാൻ സർക്കാർ നിയോഗിച്ച രണ്ടംഗ കമ്മീഷന്റെ മലപ്പുറത്തെ സ്കൂളുകളിലെ പരിശോധന ഇന്ന് പൂർത്തിയാവും. ഹയർസെക്കൻഡറി അക്കാദമിക് വിഭാഗം ജോയിന്റ് ഡയറക്ടർ ആർ സുരേഷ് കുമാറും മലപ്പുറം അർഡിഡി ഡോ പി എം അനിലുമാണ് സ്കൂളുകളിൽ സന്ദർശനം തുടരുന്നത്. പരിമിതികൾ കണ്ടെത്തിയ സ്കൂളുകളിൽ സൗകര്യങ്ങൾ ഒരുക്കിക്കൊടുക്കുമെന്ന് നേരത്തെ ഉദ്യോഗസ്ഥർ വ്യക്തമാക്കിയിരുന്നു. ഇന്ന് വൈകീട്ടോടെ ജില്ലയിൽ കുറവുള്ള പ്ലസ് വൺ സീറ്റുകളുടെ പട്ടിക ഉദ്യോഗസ്ഥർ തയ്യാറാക്കും. അതിന് ശേഷം വിശദമായ റിപ്പോർട്ട് സർക്കാറിന് സമർപ്പിക്കും. ജില്ലയിലെ തിരഞ്ഞെടുത്ത സർക്കാർ സ്കൂളുകൾ സന്ദർശിച്ചതിനിടയിൽ വേങ്ങര ഗവ സ്കൂളിലെ വിദ്യാർഥികൾ അടിസ്ഥാനസൗകര്യങ്ങൾ ഇല്ലാത്തത് ചൂണ്ടിക്കാട്ടി ഉദ്യോഗസ്ഥരോട് പരാതി പറഞ്ഞതും ചർച്ചയായിരുന്നു.