സ്വർണവില തുടർച്ചയായി താഴേക്ക്: ഗ്രാമിന് ₹75 കുറവ്

07/04/2026

Anu G Francis

തിരുവനന്തപുരം: സംസ്ഥാനത്ത് സ്വർണവില ഇന്നും കുറഞ്ഞു. ഗ്രാമിന് 75 രൂപ കുറഞ്ഞ് 13,735 രൂപയായി. പവൻ വില 600 രൂപ കുറഞ്ഞ് 1,09,880 രൂപയായിട്ടുണ്ട്. അമേരിക്കൻ ഡോളറിന്റെ വിനിമയ നിരക്ക് ഉയർന്നതും നിക്ഷേപകരുടെ ലാഭമെടുപ്പും സ്വർണവില താഴാൻ കാരണമായതായി വിപണിവൃത്തങ്ങൾ പറയുന്നു. ഇന്നലെ രാവിലെ വില കുറഞ്ഞിരുന്നെങ്കിലും ഉച്ചയോടെ വീണ്ടും ഉയർന്നിരുന്നു. ഇതിനിടെ വെടിനിർത്തൽ കരാറിൽ ഒപ്പിടാനും ഹോർമുസ് കടലിടുക്ക് തുറക്കാനുമായി ഇറാനോട് നൽകിയ അന്ത്യശാസനം നീട്ടില്ലെന്ന് യുഎസ് പ്രസിഡന്റ് ഡോണൾഡ് ട്രംപ് വ്യക്തമാക്കിയിരുന്നു. ഇതിന് ഇറാൻ ഇതുവരെ പ്രതികരിച്ചിട്ടില്ല. ഈ സാഹചര്യത്തിൽ ക്രൂഡ് ഓയിൽ വില ഉയർന്നതോടെ അമേരിക്കൻ ഡോളറിന്റെ മൂല്യവും ശക്തിപ്പെട്ടു.ഡോളറിന്റെ മൂല്യം ഉയർന്നതോടെ മറ്റ് കറൻസികളിൽ സ്വർണം വാങ്ങുന്നതിനുള്ള ചെലവ് കൂടിയതും സ്വർണവില കുറയാൻ പ്രധാന കാരണങ്ങളിലൊന്നായതായി വിലയിരുത്തപ്പെടുന്നു.