വാണിജ്യ നിയമലംഘനങ്ങൾ പൊതുജനങ്ങൾക്ക് അറിയിക്കാം; കർശന നടപടിയുണ്ടാകുമെന്ന് യുഎഇ

യുഎഇയില്‍ ഭക്ഷ്യവസ്തുക്കളുടെ വില വര്‍ദ്ധനവോ വാണിജ്യ നിയമലംഘനങ്ങളോ ശ്രദ്ധയില്‍പ്പെട്ടാല്‍ അറിയിക്കണമെന്ന് പൊതുജനങ്ങള്‍ക്ക് നിര്‍ദ്ദേശം നല്‍കി സാമ്പത്തിക, ടൂറിസം മന്ത്രാലയം. മന്ത്രാലയത്തിന്റെ ഔദ്യോഗിക സംവിധാനങ്ങളിലൂടെ പരാതികള്‍ സമര്‍പ്പിക്കാനാകും. അമിത വില ഈടാക്കുന്ന സ്ഥാപനങ്ങള്‍ക്കെതിരെ ശക്തമായ നടപടി സ്വീകരിക്കുമെന്നും മന്ത്രാലയം മുന്നറിയിപ്പ് നല്‍കി. സംഘര്‍ഷ സാഹചര്യങ്ങള്‍ മുതലെടുത്ത് ചില വ്യാപാര സ്ഥാപനങ്ങള്‍ ഉത്പ്പന്നങ്ങള്‍ക്ക് ക്രിത്രിമ വിലക്കയറ്റം സൃഷ്ടിക്കുന്നു എന്ന പരാതിയുടെ അടിസ്ഥാനത്തിലാണ് നിര്‍ദ്ദേശം. ഏതെങ്കിലും സ്ഥാപനങ്ങള്‍ അമിത വില ഈടാക്കിലായാല്‍ അക്കാര്യം ഉടന്‍ റിപ്പോര്‍ട്ട് ചെയ്യണമെന്നാണ് സാമ്പത്തിക, ടൂറിസം മന്ത്രാലയം പൊതുജനങ്ങളോട് ആവശ്യപ്പെട്ടിരിക്കുന്നത്. മന്ത്രാലയത്തിന്റെ വെബ്സൈറ്റ് വഴിയോ ഇലക്ട്രോണിക് ഉപഭോക്തൃ പരാതി സേവനത്തിലൂടെയോ വിവരങ്ങള്‍ കൈമാറാനാകും. ഇതിന് പുറമെ ടോള്‍ ഫ്രീ നമ്പര്‍ വാട്‌സാപ്പ്, ഇ-മെയില്‍ എന്നിവ വഴിയും പരാതികള്‍ സമര്‍പ്പിക്കാമെന്ന് സാമ്പത്തിക, ടൂറിസം മന്ത്രാലയം വ്യക്തമാക്കി.