ഭക്ഷണം ഉൾപ്പെടെ ഡെലിവറിക്കായി ഡ്രോണുകൾ ഉപയോഗിക്കും; ഗതാ​ഗത കുരുക്ക് ഒഴിവാക്കാൻ ദുബായ്

തിരക്കേറിയ സമയങ്ങളിൽ ദുബായ് നിവാസികൾ അനുഭവിക്കുന്ന പ്രാദേശിക ഗതാഗതക്കുരുക്കിന് ഡ്രോൺ ഡെലിവറി വലിയൊരു ആശ്വാസമാകുമെന്ന് അധികൃതർ. ചെറിയ ദൂരങ്ങളിലേക്കുള്ള ഡെലിവറികൾ ആകാശമാർ​ഗമാക്കുന്നതിലൂടെ റോഡുകളിലെ തിരക്ക് കുറയ്ക്കാനും വിതരണം വേഗത്തിലാക്കാനും സാധിക്കും. പ്രധാന ഹൈവേകളേക്കാൾ ഡെലിവറി വാഹനങ്ങൾ കൂടുതലായി എത്തുന്ന താമസമേഖലകളിലാണ് ഇതിന്റെ ഗുണം ഏറ്റവും കൂടുതൽ പ്രതിഫലിക്കുക. ഡ്രോൺ സാങ്കേതികവിദ്യ നിലവിലുള്ള ഡെലിവറി ജീവനക്കാർക്ക് ഒരു പകരക്കാരനാകില്ലെങ്കിലും ദൂരക്കുറവുള്ളതും എന്നാൽ എണ്ണത്തിൽ കൂടുതലുള്ളതുമായ ഡെലിവറികൾ ആകാശമാർ​ഗമാക്കുന്നത് റോഡുകളിലെ തിരക്ക് കുറയ്ക്കാൻ സഹായിക്കുമെന്ന് കമ്പനി വ്യക്തമാക്കുന്നു. നഗരത്തിലെ തിരക്കേറിയ മേഖലകളിൽ ഡ്രോൺ ഡെലിവറി കൃത്യമായി നടപ്പിലാക്കാൻ സാധിച്ചാൽ, റോഡുകളിലെ വാഹനത്തിരക്ക് ഒരു പരിധി വരെ ഒഴിവാക്കാൻ കഴിയുമെന്ന് അധികൃതർ വിലയിരുത്തി.