ട്വന്‍റി20 എന്‍ഡിഎ പാളയത്തില്‍: പാർട്ടി വിട്ട് മുന്‍ ജില്ലാപഞ്ചായത്ത് അംഗവും മുന്‍ ബ്ലോക്ക് പ്രസിഡന്റും

എന്‍ഡിഎയുമായി സഖ്യം പ്രഖ്യാപിച്ചതിന് പിന്നാലെ ട്വന്‍റി20 യില്‍ നിന്നും കൊഴിഞ്ഞു പോക്ക് തുടരുന്നു. നേതാക്കളും പ്രവർത്തകരും ഉള്‍പ്പെടെ നിരവധി പേരാണ് ബിജെപിയുമായുള്ള കൂട്ടുകെട്ടില്‍ പ്രതിഷേധിച്ച് പാർട്ടി വിടുന്നതായി പ്രഖ്യാപിച്ചിരിക്കുന്നത്. പാർട്ടി വിട്ടവരുടെ കൂട്ടത്തില്‍ എറണാകുളം ജില്ലാപഞ്ചായത്ത് മുന്‍ അംഗം നാസർ പിഎം, വടവുകോട് മുന്‍ ബ്ലോക്ക് പഞ്ചായത്ത് പ്രസിഡന്‍റ് റസീന പരീത അടക്കമുള്ള പ്രമുഖരുമുണ്ട്. ഫേസ്ബുക്കിലൂടെയാണ് നാസർ പിഎം താന്‍ ട്വന്‍റി20 വിടുന്നതായി പ്രഖ്യാപിച്ചത്. 'ഞാന്‍ ട്വന്‍റി20 യില്‍ നിന്നും രാജിവച്ചു. ഇനി മതേതര ജനാധിപത്യ പ്രസ്ഥാനങ്ങളോടൊപ്പം' വെങ്ങോല ഡിവിഷനില്‍ നിന്നുള്ള ട്വന്‍റി20യുടെ ജില്ലാ പഞ്ചായത്ത് അംഗമായ നാസർ ഫേസ്ബുക്കില്‍ കുറിച്ചു. ട്വന്‍റി20യുടെ ബിജെപി സഖ്യ നീക്കത്തില്‍ എതിർപ്പുള്ള ജനപ്രതിനിധികള്‍ അടക്കം കൂടുതല്‍ പേർ പാർട്ടി വിടുമെന്ന് റസീന പരീതും വ്യക്തമാക്കുന്നു. ന്യൂനപക്ഷ സമുദായങ്ങളെ ദ്രോഹിക്കുന്ന എൻഡിഎയുമായി ചേരുന്നത് അംഗീകരിക്കാനാവില്ലെന്നും അവർ അഭിപ്രായപ്പെട്ടു.