ജനവാസ മേഖലകളിൽ നിന്ന് തൊഴിലാളികളെ മാറ്റി പാർപ്പിക്കാൻ കുവൈത്ത്; ലേബർ സിറ്റികൾ സ്ഥാപിക്കും

കുവൈത്തില്‍ റസിഡന്‍ഷ്യല്‍ മേഖലകളില്‍ നിന്ന് തൊഴിലാളികളെ മാറ്റിപ്പാര്‍പ്പിക്കുന്നു. ഇതിന് പകരമായി അത്യാധുനിക സൗകര്യങ്ങളോടെയുളള ലേബര്‍ സിറ്റികള്‍ സ്ഥാപിക്കാനാണ് തീരുമാനം. ആഭ്യന്തര മന്ത്രി ഷെയ്ഖ് ഫഹദ് യൂസഫ് അല്‍-സബാഹ് ആണ് ഇത് സംബന്ധിച്ച പ്രഖ്യാപനം നടത്തിയത്. രാജ്യത്തെ താമസ മേഖലകളില്‍ വിപ്ലവകരമായ മാറ്റങ്ങള്‍ കൊണ്ടുവരുന്നതിന്റെ ഭാഗമായാണ് ജനവാസ മേഖലകളിലെ തൊഴിലാളികളെ മാറ്റിപ്പാര്‍പ്പിക്കുന്നതെന്ന് ആഭ്യന്തര മന്ത്രി വ്യക്തമാക്കി. ജലീബ് അല്‍-ഷുയൂഖ്, ഖൈതാന്‍ തുടങ്ങിയ മേഖലകളിലെ തൊഴിലാളികളായാകും ആദ്യഘട്ടത്തില്‍ പുതിയ നഗരങ്ങളിലേക്ക് മാറ്റുക. തൊഴിലാളികളുടെ പുനരധിവാസത്തിനായി അത്യാധുനിക സൗകര്യങ്ങളോടെയുള്ള ലേബര്‍ സിറ്റികള്‍ സ്ഥാപിക്കാനാണ് തീരുമാനം. ഇതിന്റെ നിര്‍മ്മാണ പ്രവര്‍ത്തനങ്ങള്‍ ഉടന്‍ ആരംഭിക്കുമെന്നും ആഭ്യന്തര മന്ത്രി അറിയിച്ചു.