ഇന്ദിരയ്ക്ക് രാഷ്ട്രീയത്തിൽ രണ്ടാം ഇന്നിങ്‌സ് സമ്മാനിച്ച ബിഹാർ; ബെൽചി ഇന്ദിരയെ അധികാരത്തിലെത്തിച്ചത് എങ്ങനെ? ഇന്ത്യൻ രാഷ്ട്രീയത്തിലെ ഏറ്റവും പ്രധാനപ്പെട്ട സംഭവ വികാസങ്ങളുടെ പട്ടിക പരിശോധിച്ചാൽ ബെൽചി മൊമൻ്റ് ഇന്ദിരാ ഗാന്ധിക്കും കോൺഗ്രസിനും എത്രമാത്രം പ്രധാനമായിരുന്നു എന്ന് കാണാൻ കഴിയും

ബെൽചി മൊമൻ്റ്. സ്റ്റീരിയോടൈപ്പുകളെ ഉടച്ചുവാർത്തുകൊണ്ട്, ഇന്ത്യൻ രാഷ്ട്രീയത്തിൽ അരങ്ങേറുന്ന പല സംഭവവികാസങ്ങളെയും നമ്മൾ ഇങ്ങനെ വിളിച്ചുപോരാറുണ്ട്. അവ യാത്രകളോ, പ്രധാനപ്പെട്ട സന്ദർശനങ്ങളോ അങ്ങനെ എന്തുമാകട്ടെ. വോട്ടുചോരി വെളിപ്പെടുത്തലുകൾക്ക് പിന്നാലെ വോട്ട് അധികാർ യാത്രയുമായി രാഹുൽഗാന്ധി ബിഹാറിൽ കളം നിറഞ്ഞപ്പോൾ മാധ്യമങ്ങൾ അവയെ വിശേഷിപ്പിച്ചത് രാഹുലിന്റെ ബെൽചി മൊമെന്റ് എന്നായിരുന്നു. യാദൃശ്ചികമോ സാന്ദർഭികമോ ആകട്ടെ, ബെൽചി മൊമൻ്റ് എന്ന വാക്ക് ഉടലെടുക്കാൻ ഇടയായ സംഭവം നടന്നതും ബിഹാറിലാണ്. അതിന് കാരണക്കാരിയായത് ഇന്ത്യയുടെ മുൻ പ്രധാനമന്ത്രിയായ ഇന്ദിര ഗാന്ധിയും.