ഇത് അഭ്യാസമല്ല, അഹങ്കാരം; റെയിൽവേ ട്രാക്കിലൂടെ 65-കാരന്റെ ഥാർ അഭ്യാസം, ഒടുവിൽ അറസ്റ്റ്

EDITOR

നിരത്തുകളിലെ വാഹനാഭ്യാസം ദുരന്തത്തിൽ കാലാശിക്കുന്നത് നിത്യസംഭവമാണ്. റീൽ ചിത്രീകരണത്തിനും മറ്റുമായി വാഹനം കടലിലും പുഴയിലും ഇറക്കുന്നതും മല കയറ്റുന്നതുമെല്ലാം സാമൂഹിക മാധ്യമങ്ങളിൽ സ്ഥിരമായി കാണാറുള്ളതാണ്. എന്നാൽ, വാഹനം ഉപയോഗിച്ച് കാണിക്കുന്ന അഹങ്കാരത്തിന്റെ മറ്റൊരു രൂപമാണ് കഴിഞ്ഞ ദിവസം സാമൂഹിക മാധ്യമങ്ങളിൽ ചർച്ചയായ ദൃശ്യങ്ങൾ. മഹീന്ദ്ര ഥാറുമായി റെയിൽവേ പാളത്തിൽ ഇറങ്ങിയായിരുന്നു ഈ അഭ്യാസം. നാഗലാന്റ് ദിമാപൂരിൽ ഡിസംബർ 17-നാണ് സംഭവം. 65-കാരനായ മഹീന്ദ്ര ഥാർ ഉടമ അയാളുടെ വാഹനവുമായി റെയിൽവേ ട്രാക്കിലേക്ക് പ്രവേശിക്കുകയായിരുന്നു. ട്രാക്കിലൂടെ വാഹനമോടിക്കാൻ ശ്രമിക്കുന്നതിനിടെ റെയിൽവേ ജീവനക്കാരും പോലീസും ചേർന്ന് അദ്ദേഹത്തെ പിടികൂടുകയും വാഹനം പുറത്തെടുക്കുകയുമായിരുന്നു. വാഹനത്തേയും ഡ്രൈവറേയും പുറത്തെത്തിച്ചതിന് പിന്നാലെ പോലീസ് ഇയാളെ അറസ്റ്റ് ചെയ്യുകയുമായിരുന്നുവെന്നാണ് റിപ്പോർട്ട്.