രാഹുലിന്റെ മുൻകൂർ ജാമ്യം: സർക്കാർ അപ്പീലിൽ വാദം മാറ്റി

Editor

പത്തനംതിട്ട: രണ്ടാമത്തെ ബലാത്സംഗ പരാതിയിൽ രാഹുൽ മാങ്കൂട്ടത്തിലിന് മുൻകൂർ ജാമ്യം നൽകിയ തിരുവനന്തപുരം സെഷൻസ് കോടതി ഹർജി ചോദ്യംചെയ്ത് സർക്കാർ ഹൈക്കോടതിയിൽ സമർപ്പിച്ച ഹർജി മാറ്റിവെച്ചു. ക്രിസ്മസ് അവധിക്ക് ശേഷമായിരിക്കും ഹർജി പരിഗണിക്കുക. സർക്കാർ ഹർജിയിൽ മറുപടി നൽകാൻ രാഹുൽ കൂടുതൽ സമയം ആവശ്യപ്പെട്ടിരുന്നു. ഇതിന്റെ പശ്ചാത്തലത്തിലാണ് ഹർജി പരിഗണിക്കുന്നത് ഹൈക്കോടതി മാറ്റിവെച്ചത്. അതേസമയം, രാഹുൽ മാങ്കൂട്ടത്തിലിന്റെ നീക്കം പോലീസ് നിരീക്ഷിച്ചുവരികയാണ്. പത്തനംതിട്ടയിലെ വീടിന് വെളിയിൽ മഫ്തിയിൽ പോലീസ് നിലയുറപ്പിച്ചിട്ടുണ്ട്. അടൂരിലെ രാഹുലിന്റെ വീടിന് പോലീസ് സംരക്ഷണവും ഏർപ്പെടുത്തിയിട്ടുണ്ട്. തിങ്കളാഴ്ച വീട്ടിൽനിന്ന് ഒറ്റയ്ക്ക് സ്കൂട്ടർ ഓടിച്ച് പോയ രാഹുലിന് പിന്നാലെ മഫ്തിയിൽ ഉണ്ടായിരുന്ന പോലീസും പോയി. പിന്നീട് ക്ഷേത്ര ദർശനം കഴിഞ്ഞ ശേഷം രാഹുൽ വീട്ടിലേക്ക് തിരിച്ചുപോയി. പാലക്കാട്ടുനിന്ന് കഴിഞ്ഞ ദിവസം രാത്രിയിലാണ് രാഹുൽ അടൂർ മുണ്ടപ്പള്ളിയിലെ വീട്ടിൽ എത്തിയത്. ആദ്യ ബലാത്സംഗക്കേസിൽ തിരുവനന്തപുരം സെഷൻസ് കോടതി രാഹുലിന് മുൻകൂർ ജാമ്യം നിഷേധിച്ചിരുന്നു. തുടർന്ന് രാഹുൽ മാങ്കൂട്ടത്തിൽ നൽകിയ മുൻകൂർജാമ്യ ഹർജി ഉച്ചയോടെ ഹൈക്കോടതി പരിഗണിക്കുന്നുണ്ട്.