ശിവരാജ് പാട്ടീൽ: കോൺഗ്രസ് സർക്കാരുകളിൽ കരുത്തൻ, തുടക്കം നഗരസഭാ അധ്യക്ഷനായി

13/12/2025

EDITOR

മുംബൈ: മഹാരാഷ്ട്രയിൽനിന്ന് ദേശീയരാഷ്ട്രീയത്തിലേക്ക് ഉയർന്നുവന്ന നേതാവാണ് വിടപറഞ്ഞ ശിവരാജ് പാട്ടീൽ. അവസാനനാളുകൾവരെ കോൺഗ്രസിന്റെയും നെഹ്റു-ഗാന്ധി കുടുംബത്തിന്റെയും വിശ്വസ്തനായി പാട്ടീൽ തുടർന്നു. 2008-ൽ കേന്ദ്ര ആഭ്യന്തരമന്ത്രിയായിരിക്കെ, ഭീകരാക്രമണം നേരിടേണ്ടിവന്ന നവംബർ 26-ന് രാത്രിയിൽ മൂന്ന് വ്യത്യസ്തവേഷത്തിൽ പ്രത്യക്ഷപ്പെട്ട അദ്ദേഹം പൊതുജനങ്ങളുടെയും മാധ്യമങ്ങളുടെയും കടുത്തവിമർശനത്തിനിരയായി. വിമർശനത്തിനെതിരേ സ്വയം ന്യായീകരിച്ചുകൊണ്ട്, ആളുകൾ നയങ്ങളെയാണ് വിമർശിക്കേണ്ടത്, വസ്ത്രങ്ങളെയല്ല എന്ന് അദ്ദേഹം പറഞ്ഞെങ്കിലും ഭീകരാക്രമണത്തിന്റെ രാഷ്ട്രീയവ്യാപ്തി പാട്ടീലിനെ പ്രതികൂലമായി ബാധിച്ചു. 2008 നവംബർ 30-ന് അദ്ദേഹം മുംബൈ ഭീകരാക്രമണത്തിന്റെ ഉത്തരവാദിത്വം ഏറ്റെടുത്ത്‌ കേന്ദ്രആഭ്യന്തരമന്ത്രിസ്ഥാനം രാജിവെച്ചു.