'ഉദ്യോഗസ്ഥർ എന്താണ് ചെയ്യുന്നത്? അവരെ കോടതി കയറ്റണം;' വോട്ടർ പട്ടികയിൽ തെരഞ്ഞെടുപ്പ് കമ്മീഷനെതിരെ ശബരീനാഥൻ

13/12/2025

EDITOR

തിരുവനന്തപുരം: തെരഞ്ഞെടുപ്പ് കമ്മീഷനെതിരെ ആഞ്ഞടിച്ച് യുഡിഎഫ് സ്ഥാനാര്‍ത്ഥിയും മുന്‍ എംഎല്‍എയുമായ കെ എസ് ശബരീനാഥന്‍. പോളിംഗ് ശതമാനം കുറയാന്‍ കാരണം തെരഞ്ഞെടുപ്പ് കമ്മീഷനാണെന്ന് ശബരീനാഥന്‍ റിപ്പോര്‍ട്ടറിനോട് പറഞ്ഞു. യുക്തിരഹിതമായ ഒരു വോട്ടര്‍പട്ടിക ആണ് കമ്മീഷന്‍ തയ്യാറാക്കിയതെന്നും കെ എസ് ശബരീനാഥന്‍ പറഞ്ഞു. 'മരിച്ചവരുടെ പേരുകള്‍ വോട്ടര്‍ പട്ടികയില്‍ ഉണ്ട്. പുതിയതായി വോട്ട് ചേര്‍ത്തവരുടെ പേര് പട്ടികയില്‍ ഇല്ല. സര്‍ക്കാര്‍ ജനങ്ങളോട് കാണിക്കേണ്ട ഉത്തരവാദിത്തം ഉദ്യോഗസ്ഥര്‍ ചെയ്തില്ല. ഉദ്യോഗസ്ഥരെ കോടതി കയറ്റേണ്ടതാണ്. ഈ ഉദ്യോഗസ്ഥര്‍ എന്താണ് അവിടെ ചെയ്തുകൊണ്ടിരിക്കുന്നത്. വെട്ടിച്ചുരുക്കി ഇങ്ങനെ പുതിയ വാര്‍ഡ് ഉണ്ടാക്കിയത് എന്തിനാണ്. ഒരേ കെട്ടിടത്തിലെ ആള്‍ക്കാര്‍ രണ്ടു വാര്‍ഡുകളിലാണ്. ആളുകള്‍ ഏതു കൗണ്‍സിലറുടെ അടുത്ത് പോകും', ശബരീനാഥന്‍ പറഞ്ഞു.