ഡിജിറ്റൽ അറസ്റ്റുവഴി കവരാൻ ശ്രമിച്ചത് 84 ലക്ഷം; വൃദ്ധദമ്പതിമാരുടെ പണം തട്ടാനുള്ള ശ്രമം പരാജയപ്പെടുത്തി ബാങ്ക് മാനേജർ

06/12/2025

EDITOR

മംഗളൂരു: വൃദ്ധദമ്പതിമാരെ ഡിജിറ്റൽ അറസ്റ്റെന്ന പേരിൽ ഭീഷണിപ്പെടുത്തി പണം തട്ടാനുള്ള ശ്രമം ബാങ്ക് മാനേജരുടെ അവസരോചിതമായ ഇടപെടലിൽ പരാജയപ്പെട്ടു. കിന്നിഗോളി ദമാസ്‌കട്ടെയിലെ വൃദ്ധദമ്പതിമാരെയാണ് ഒരാൾ ഫോൺ ചെയ്ത് 'നിങ്ങൾ ഡിജിറ്റൽ അറസ്റ്റിലാണെന്നും ബാങ്കിൽ സൂക്ഷിച്ച പണം ഉടൻ കൈമാറണമെന്നും ഇല്ലെങ്കിൽ കൊന്നുകളയുമെന്നും ഭീഷണിപ്പെടുത്തിയത് ' ഭയന്ന ദമ്പതിമാർ ഉടൻ ബാങ്ക് മാനേജരെ വിളിച്ച് ഫിക്സഡ് ഡിപ്പോസിറ്റിലെ 84 ലക്ഷം രൂപ സേവിങ്‌സ് അക്കൗണ്ടിലേക്ക് മാറ്റണമെന്ന് ആവശ്യപ്പെട്ടു. ദമ്പതിമാരുടെ സംസാരത്തിൽ സംശയം തോന്നിയ മാനേജർ ഉടൻ മുൽക്കി പോലീസ് സ്റ്റേഷനിൽ വിവരം അറിയിക്കുകയായിരുന്നു. പോലീസ് ഉടൻ വീട്ടിലെത്തിയതോടെയാണ് ഡിജിറ്റൽ അറസ്റ്റെന്ന പേരിൽ ഭീഷണിപ്പെടുത്തി പണം തട്ടാനുള്ള ശ്രമമാണെന്ന് മനസ്സിലായത്. ഉടൻ ബാങ്ക് അക്കൗണ്ട് താത്‌കാലികമായി മരവിപ്പിച്ചു. ഡിജിറ്റൽ അറസ്റ്റ് എന്നൊന്നില്ലെന്നും ഇത് ഓൺലൈൻ തട്ടിപ്പിനായി ഉപയോഗിക്കുന്ന തന്ത്രമാണെന്നും ഇത്തരം ഭീഷണി വന്നാൽ ഉടൻ പോലീസിൽ അറിയിക്കണമെന്നും ഉദ്യോഗസ്ഥർ മുന്നറിയിപ്പുനൽകി. സംഭവത്തിൽ പോലീസ് അന്വേഷണമാരംഭിച്ചു.