നടി ഇന്ദുലേഖ അഭിനയരംഗത്ത് 30 വര്‍ഷം പിന്നിട്ടിരിക്കുന്നു. പ്രതിസന്ധികളോട് തനിച്ചു നിന്ന് പൊരുതിക്കയറിയ അവരുടെ ജീവിതം ഏത് മേഖലയിലെയും സ്ത്രീകള്‍ക്ക് പ്രചോദനമാണ്.

1/11/25

ഏതു പ്രതികൂല ഘട്ടങ്ങളെയും ഒരു നിറചിരികൊണ്ട് നേരിടുന്ന സ്ത്രീ എന്നാണ് ഇന്ദുലേഖയെ അടുത്തറിയുന്നവര്‍ വിലയിരുത്തുന്നത്. പരാതിയുടെ ഭാണ്ഡക്കെട്ടുകള്‍ അഴിക്കാന്‍ നില്‍ക്കാതെ ജീവിതം എങ്ങനെ സുഗമമായി മുന്നോട്ട് കൊണ്ടുപോകാം എന്ന് ചിന്തിക്കുന്ന വ്യക്തി. തനിക്ക് താനും പുരയ്ക്ക് തൂണും എന്ന പോലെ സ്വന്തം കാലില്‍ നിവര്‍ന്നു നില്‍ക്കാന്‍ എന്നും അവര്‍ ശ്രമിച്ചു പോന്നു. സ്ത്രീകള്‍ സ്വയം പര്യാപ്തരാവേണ്ട കാലത്ത് അതുകൊണ്ട് തന്നെ ഇന്ദുവിന്റെ ജീവിതം ഒരു മാതൃകയാണ്. പുരാണ സീരിയലുകളില്‍ ഏറ്റവും കൂടുതല്‍ തവണ ദേവിയുടെ വേഷം ചെയ്ത ഇന്ദുലേഖയെ ദൈവം കണക്കിലേറെ പരീക്ഷിച്ചു. അതുപോലെ തന്നെ അതിനെയെല്ലാം മറികടക്കാനുളള ആത്മബലവും നല്‍കി.