മുഖ്യമന്ത്രി ഉറപ്പ് നൽകി, രാപ്പകല്‍ അവസാനിപ്പിക്കാൻ ആശമാർ

31/10/25

തിരുവനന്തപുരം∙ സംസ്ഥാനത്ത് സ്ത്രീമുന്നേറ്റങ്ങളില്‍ പുതുചരിത്രമെഴുതി 266 ദിവസമായി സെക്രട്ടേറിയറ്റിന് മുന്നില്‍ കേരള ആശാ ഹെല്‍ത്ത് വര്‍ക്കേഴ്‌സ് അസോസിയേഷന്‍ നടത്തുന്ന രാപ്പകല്‍ സമരം കേരളപ്പിറവി ദിനമായ നാളെ അവസാനിപ്പിക്കും. ആശാവര്‍ക്കര്‍മാരുടെ ഓണറേറിയം ആയിരം രൂപ വര്‍ധിപ്പിക്കുമെന്ന് മുഖ്യമന്ത്രി പിണറായി വിജയന്‍ കഴിഞ്ഞ ദിവസം പ്രഖ്യാപിച്ചതിനു പിന്നാലെയാണ് സമരം അവസാനിപ്പിക്കാനുള്ള തീരുമാനം. പ്രാദേശികതലങ്ങളില്‍ സമരം തുടരും. 2026 ഫെബ്രുവരി 10 ന് സമരം ഒരു വര്‍ഷം തികയുന്ന ദിവസം മഹാ പ്രതിഷേധ സംഗമം സംഘടിപ്പിക്കും. നാളെ രാവിലെ 11.30 ന് ആശമാര്‍ നടത്തുന്ന സമര പ്രതിജ്ഞാ റാലി പ്രതിപക്ഷ നേതാവ് വി.ഡി. സതീശന്‍ ഉദ്ഘാടനം ചെയ്യും. ആയിരം രൂപ വര്‍ധിപ്പിച്ചതിന്റെ ക്രെഡിറ്റ് അടിച്ചെടുക്കാന്‍ സിഐടിയു ശ്രമിക്കുന്നതില്‍ സമരസമിതിക്ക് കടുത്ത അതൃപ്തിയുണ്ട്.