വോട്ടർപ്പട്ടിക പ്രത്യേക തീവ്ര പുനഃപരിശോധന; പ‍ൗരത്വ ഭേദഗതി നടപ്പാക്കാനുള്ള നീക്കം: സിപിഐ എം

30/10/25

തിരുവനന്തപുരം: വോട്ടർപ്പട്ടിക പ്രത്യേക തീവ്രപുനഃപരിശോധന(എസ്‌ഐആർ) മറവിൽ പ‍ൗരത്വ ഭേദഗതി നടപ്പാക്കാനാണ്‌ ശ്രമമെന്ന്‌ സിപിഐ എം സംസ്ഥാന സെക്രട്ടറിയറ്റ്‌ അംഗം എം വി ജയരാജൻ. എസ്‌ഐആറിന്റെ ഭാഗമായി മുഖ്യ തെരഞ്ഞെടുപ്പ്‌ ഓഫീസർ വിളിച്ച രാഷ്ട്രീയ പാർടികളുടെ യോഗത്തിലാണ്‌ പരാമർശം. കേന്ദ്ര തെരഞ്ഞെടുപ്പ്‌ കമീഷൻ ബിജെപിയുടെ ചട്ടുകമായി പ്രവർത്തിക്കുകയാണ്‌. വിയോജിപ്പുകളെ തിരസ്കരിക്കുക മാത്രമല്ല, നിഷ്കാസനം ചെയ്യിക്കുകയാണ് ബിജെപി നയം. പൗരത്വ രജിസ്റ്റർ വളഞ്ഞ വഴിയിലൂടെ നടപ്പാക്കാ ൻ എസ്ഐആർ എന്ന ഓമനപ്പേരിട്ട് കൊണ്ടുവന്നു. എന്യൂമറേഷൻ ഫോറത്തിലെ മൂന്ന്‌ വ്യവസ്ഥകൾ ശ്രദ്ധിച്ചാൽ മനസിലാകും. 1987 ജൂലൈ ഒന്നിനുമുമ്പ് ജനിച്ചവർ, 1987നും 2004നും ഇടയിൽ ജനിച്ചവർ, 2004-നുശേഷം ജനിച്ചവർ എന്നിങ്ങനെ തരംതിരിക്കുന്നു. പാർലമെന്റ്‌ പാസാക്കിയ പൗരത്വ ഭേദഗതി നിയമത്തെ അടിസ്ഥാനമാക്കിയുള്ള വർഷങ്ങളാണിത്‌.