ട്രെയിൻ യാത്രയിൽ എസി കോച്ചുകളില്‍ ഇനി വെള്ള ബെഡ് ഷീറ്റില്ല!

25/10/25

എസി കോച്ചുകളില്‍ യാത്രികര്‍ക്ക് നല്‍കുന്ന വെള്ള കമ്പിളി പുതപ്പുകള്‍ക്ക് വൃത്തിയില്ലെന്ന പരാതിക്ക് പരിഹാരം കാണാനൊരുങ്ങി റെയില്‍വേ. വെള്ള കമ്പിളി പുതപ്പുകള്‍ക്ക് സാന്‍ഗനേരി പ്രിന്റഡ് ബ്ലാങ്കറ്റ് കവറുകള്‍ നല്‍കുന്ന പദ്ധതി ജയ്പൂര്‍- അസര്‍വ സൂപ്പര്‍ഫാസ്റ്റ് എക്‌സ്പ്രസിലാണ് ആരംഭിച്ചത്. ജയ്പൂരിലെ ഖാതിപുര റെയില്‍വേ സ്റ്റേഷനിലായിരുന്നു പദ്ധതിയുടെ ഉദ്ഘാടനം നടന്നത്. രാജസ്ഥാനിലെ പരമ്പരാഗത കൈത്തറിയായ സാന്‍ഗനേരിയില്‍ നിന്നുള്ള പ്രിന്റഡ് ബ്ലാങ്കറ്റ് കവറുകളാണ് റെയില്‍വേ അവതരിപ്പിച്ചിരിക്കുന്നത്. വെള്ള പുതപ്പുകള്‍ മാറ്റണമെന്ന ഏറെക്കാലമായുള്ള നിരവധി യാത്രികരുടെ ആവശ്യമാണ് കഴുകാന്‍ സാധിക്കുന്ന പുതിയ പ്രിന്റഡ് ബ്ലാങ്കറ്റ് കവറുകളുടെ വരവോടെ പരിഹരിക്കപ്പെട്ടിരിക്കുന്നത്. എസി കോച്ചുകളിലെ യാത്രികര്‍ക്ക് നല്‍കുന്ന പുതപ്പുകള്‍ പലപ്പോഴും വൃത്തിയില്ലാത്തവയാണെന്ന് നേരത്തെ പരാതി ഉയര്‍ന്നിരുന്നു. ഇതിനെതിരായ പരാതികള്‍ വര്‍ധിച്ചതോടെയാണ് നടപടിക്ക് റെയില്‍വേ തീരുമാനിച്ചത്.