മോഹൻലാലിന് ആനക്കൊമ്പ് കൈവശം വയ്ക്കാനുള്ള ലൈസൻസ് കോടതി റദ്ദാക്കി

24/10/25

കൊച്ചി: നടൻ മോഹൻലാലിന് ആനക്കൊമ്പിൻറെ ഉടമസ്ഥാവകാശം നൽകിയ നടപടി ഹൈക്കോടതി റദ്ദാക്കി. ഇക്കാര്യത്തിൽ പുതിയ വിജ്ഞാപനം ഇറക്കാൻ സർക്കാരിന് കോടതി നിർദേശം നൽകി. 2011ൽ തേവരയിലെ മോഹൻലാലിൻറെ വീട്ടിൽ റെയ്ഡിനെത്തിയ ആദായ നികുതി വകുപ്പ് സംഘമാണ് വീട്ടിൽ നിന്ന് ആനക്കൊമ്പുകൾ കണ്ടെത്തിയത്. സംഭവത്തിൽ മോഹൻലാൽ കോടതിയിൽ നേരിട്ട് ഹാജരാകണമെന്ന് വിചാരണ കോടതി നേരത്തെ ഉത്തരവിട്ടിരുന്നു. കേസ് പിൻവലിച്ച സർക്കാർ നടപടി റദ്ദാക്കിയായിരുന്നു വിചാരണ കോടതി ഉത്തരവ്. അതിനെതിരെ മോഹൻലാൽ ഹൈക്കോടതിയെ സമീപിച്ച് സ്റ്റേ സമ്പാദിച്ചിരുന്നു. ആനക്കൊമ്പ് കേസ് തന്റെ പ്രതിച്ഛായ തകർക്കാൻ കെട്ടിച്ചമച്ചതാണെന്നും വ്യക്തികളും സംഘടനകളും പൊതുതാൽപ്പര്യക്കാരെന്ന് നടിച്ച് ഒന്നിന്‌ പിറകേ ഒന്നായി കള്ളക്കേസുകൾ നൽകുകയാണെന്നും മോഹൻലാൽ ഹൈക്കോടതിയിൽ സത്യവാങ്മൂലം നൽകിയിരുന്നു.