സ്കൂൾ പാഠ്യപദ്ധതിയിൽ എഐ അടുത്തവർഷം മുതൽ

13/10/25

ന്യൂഡൽഹി ∙ ആർട്ടിഫിഷ്യൽ ഇന്റലിജൻസ് (എഐ) അടുത്ത അധ്യയനവർഷം മുതൽ സ്കൂൾ പാഠ്യപദ്ധതിയുടെ ഭാഗമാക്കാൻ കേന്ദ്ര വിദ്യാഭ്യാസ മന്ത്രാലയം ഒരുങ്ങുന്നു. മൂന്നാം ക്ലാസ് മുതൽ പാഠ്യപദ്ധതിയിൽ എഐ ഉൾപ്പെടുത്താൻ ചട്ടക്കൂട് തയാറാക്കുകയാണെന്ന് അധികൃതർ പറഞ്ഞു. ക്ലാസിൽ പഠനവിഷയങ്ങൾ അവതരിപ്പിക്കാനുള്ള നോട്ടുകൾ എഐ ടൂളുകളുടെ സഹായത്തോടെ തയാറാക്കുന്നതിന്റെ പരീക്ഷണം ആരംഭിച്ചുകഴിഞ്ഞു. അധ്യാപകർക്ക് ഇതു ലഭ്യമാക്കിയിട്ടുണ്ട്. നിലവിൽ ഏകദേശം 18,000 സിബിഎസ്ഇ സ്കൂളുകളിൽ അധികപഠനത്തിന്റെ ഭാഗമായി ആറാം ക്ലാസ് മുതൽ നൈപുണ്യശേഷി വിഷയമായി എഐ പഠിപ്പിക്കുന്നുണ്ട്. 15 മണിക്കൂർ ദൈർഘ്യമുള്ള മൊഡ്യൂളാണിത്. 9–12 ക്ലാസുകളിൽ ഓപ്ഷനൽ വിഷയമായും പഠിപ്പിക്കുന്നുണ്ട്.