ഒരേ സമയം സ്ക്രബും ഫെയ്സ്മാസ്ക്കും, മുഖക്കുരു മുതൽ ഡാർക്ക് സർക്കിൾ വരെ പമ്പകടക്കാൻ കാപ്പിപ്പൊടി മാജിക്

13/10/25

കാലത്തെണീറ്റൊരു കട്ടൻ കുടിച്ചാലേ ഒരു ഉഷാറൊക്കെത്തോന്നൂവെന്ന് പറയാറുണ്ട് കാപ്പിപ്രേമികളിൽ പലരും. ശരീരത്തിന് ഉന്‍മേഷം തരാൻ മാത്രമല്ല ചർമത്തിനുണ്ടാകുന്ന ഒരുവിധ പ്രശ്നങ്ങളെയൊക്കെ അകറ്റാനും കാപ്പി ബെസ്റ്റാണെന്നു പറയുകയാണ് സൗന്ദര്യ സംരക്ഷണ വിദഗ്ധർ. ആന്റിഓക്‌സിഡന്റുകൾ, കഫീൻ, പ്രകൃതിദത്ത എക്സ്ഫോളിയേറ്റിങ് ഗുണങ്ങൾ എന്നിവ കാപ്പിയുടെ പ്രത്യേകതയാണ്. ചർമത്തിന്റെ വീക്കം, കണ്ണിനു ചുറ്റുമുള്ള കറുപ്പ് എന്നിവയകറ്റാനും ‌മൃതകോശങ്ങളെയകറ്റി ചർമത്തെ മൃദുവായി സൂക്ഷിക്കാനും കാപ്പിപ്പൊടി സഹായിക്കും. ഒരേ സമയം സ്ക്രബായും ഫേസ്മാസ്ക്കായും ഉപയോഗിക്കാമെന്ന മെച്ചവും കാപ്പിപ്പൊടിയ്ക്കുണ്ട്. കാപ്പിപ്പൊടിയിലടങ്ങിയിരിക്കുന്ന കഫീന് രക്തചംക്രമണത്തെ ഉത്തേജിപ്പിക്കാനുള്ള ശേഷിയുള്ളതിനാൽ കാപ്പിപ്പൊടി ഉപയോഗിച്ച് സ്ക്രബ് ചെയ്യുമ്പോൾ മുഖത്തെ വീക്കം കുറയുകയും മുഖകാന്തി വർധിക്കുകയും ചെയ്യും.