പ്രായം പ്രശ്നമല്ല; ഭരിക്കുന്നവരും സ്വാർഥരും ആകരുത്; ജെന്‍ സിയെ പ്രണയിക്കണമെങ്കിൽ ചിലത് അറിയണം

4/10/25

കലിപ്പൻമാരെയും കാന്താരികളെയും പ്രണയിക്കാൻ ചിലർക്കൊക്കെ ഇഷ്ടമാണെങ്കിലും ജീവിതാവസാനം വരെ ഒപ്പം നിൽക്കുന്ന പങ്കാളികളായി അവരെ തിരഞ്ഞെടുക്കാൻ പുതു തലമുറയിലെ പലരും അത്രത്തോളം താൽപര്യം പ്രകടിപ്പിക്കാറില്ല. വൈകാരികമായി പക്വതയുള്ള പങ്കാളിയോടൊപ്പം ജീവിതം ചെലവഴിക്കാനാണ് അവർ ആഗ്രഹിക്കുന്നത്. ആദ്യത്തെ കൗതുകവും ഒരുമിച്ചുള്ള നിമിഷങ്ങളുടെ ഓർമകളുമൊക്കെ നിറം മങ്ങിത്തുടങ്ങുമ്പോൾ ജീവിതത്തിലെ യാഥാർഥ്യങ്ങളുമായി പൊരുത്തപ്പെടുന്ന പങ്കാളി ഒപ്പമുണ്ടെങ്കിൽ ജീവിതം സമാധാന പൂർണമാകുമെന്നും അവർ വിശ്വിസിക്കുന്നു. പരസ്പരം മനസ്സിലാക്കി, സാഹചര്യങ്ങളെ ബുദ്ധിപരമായി കൈകാര്യം ചെയ്യാൻ ശേഷിയുള്ള, വിയോജിപ്പു പോലും ആരോഗ്യപരമായി പ്രകടിപ്പിക്കാൻ ശേഷിയുള്ള, വ്യക്തി ജീവിതത്തിലും കരിയറിലും ഒരുപോലെ വളരാൻ കട്ടയ്ക്കു നിൽക്കുന്ന ഒരു പങ്കാളിയെയാണ് അവർ തേടുന്നതും കൂടെക്കൂട്ടാൻ ആഗ്രഹിക്കുന്നതും. പങ്കാളിയുടെ പ്രായം ഇവർക്കൊരു പ്രശ്നമേയല്ല. സ്വയം ബോധ്യമുള്ള, നാടകീയതയ്ക്ക് തീരെ താൽപര്യമില്ലാത്ത പരസ്പരം ബഹുമാനിക്കാൻ തയാറുള്ള ആളായിരിക്കണം എന്ന നിബന്ധനയാണവർക്കുള്ളത്.