കാന്താര’യുടെ വിജയം ‘കത്തനാരു’ടെ വീട്ടിൽ വച്ച് ആഘോഷിച്ച് ഋഷഭ് ഷെട്ടി

4/10/25

കന്നഡ സിനിമയിലെ സൂപ്പർഹിറ്റ് ചിത്രമായ 'കാന്താര ചാപ്റ്റർ 1'-ന്റെ വിജയത്തിളക്കം നടനും സംവിധായകനുമായ ഋഷഭ് ഷെട്ടി അടുത്ത സുഹൃത്തായ മലയാള സിനിമാ താരം ജയസൂര്യയോടൊപ്പം ആഘോഷിച്ചു. ഒരത്യാവശ്യത്തിനായി കൊച്ചിയിലെത്തിയപ്പോഴാണ് ഋഷഭ് ഷെട്ടി ജയസൂര്യയുടെ വീട്ടിലേക്ക് എത്തിയത്. 'കാന്താര'യുടെ വലിയ വിജയം ആഘോഷിക്കാൻ ജയസൂര്യയും കുടുംബവും ചേർന്ന് ഒരു കേക്ക് ഒരുക്കിയിരുന്നു. കേക്ക് മുറിച്ച് സന്തോഷം പങ്കുവച്ച ശേഷം ഋഷഭ് ഷെട്ടി ഉച്ചഭക്ഷണവും കഴിച്ചാണ് മടങ്ങിയത്. സിനിമയ്ക്ക് ലഭിക്കുന്ന വൻ സ്വീകരണത്തിലുള്ള തന്റെ സന്തോഷം ജയസൂര്യയുടെ കുടുംബവുമായി പങ്കുവയ്ക്കാൻ ഋഷഭ് മറന്നില്ല. ഇന്നലെ കുടുംബവുമൊത്ത് ‘കാന്താര’ സിനിമ കണ്ടതിന് ശേഷം സിനിമയെ പ്രശംസിച്ച് ജയസൂര്യ സോഷ്യൽ മീഡിയയിൽ കുറിപ്പ് പങ്കുവച്ചിരുന്നു.