ഡൽഹിയിൽ മലയാളി വിദ്യാർഥികൾക്ക് പൊലീസിന്റെ മര്‍ദനം: അപലപനീയമെന്ന് ജോൺ ബ്രിട്ടാസ് എംപി

26/9/25

ന്യൂഡൽഹി : മലയാളി വിദ്യാർഥികൾക്കെതിരെ ഡൽഹിയിൽ നടന്ന പൊലീസ് അതിക്രമത്തിൽ ഡോ. ജോൺ ബ്രിട്ടാസ് എംപി അപലപിച്ചു. സംഭവത്തിൽ ഡൽഹി പൊലീസ് കമീഷണറെ എം പി ശക്തമായ പ്രതിഷേധം അറിയിച്ചു. ഡൽഹി സാക്കിർ ഹുസൈൻ കോളേജിലെ മലയാളി വിദ്യാർഥികളായ അശ്വന്ത് ഐ ടി, സുധിൻ കെ എന്നിവരെയാണ് പൊലീസ് അപമാനിച്ചത്. ഇരുവരും ഒന്നാം വർഷ വിദ്യാർഥികളാണ്. സെപ്തംബർ 24നാണ് ചെങ്കോട്ടയ്ക്ക് സമീപത്തുവച്ച് രണ്ട് വിദ്യാർഥികളെയും വ്യാജ കുറ്റം ചുമത്തി പ്രദേശവാസികളും പൊലീസ് ഉദ്യോഗസ്ഥരും മർദിച്ചത്. പൊലീസ് സ്റ്റേഷനുള്ളിൽ വച്ചും വിദ്യാർഥികളെ ക്രൂരമായി മർദ്ദിക്കുകയും വലിച്ചിഴയ്ക്കുകയും അപമാനിക്കുകയും ചെയ്തു. ഇംഗ്ലീഷിൽ സംസാരിച്ചതിന് വിദ്യാർഥികളെ മർദിക്കുകയും അധിക്ഷേപിക്കുകയും ഹിന്ദിയിൽ സംസാരിക്കാൻ നിർബന്ധിക്കുകയും ചെയ്തുവെന്ന റിപ്പോർട്ടുകൾ പുറത്തുവരുന്നുണ്ട്. ഇത് ഏറെ അസ്വസ്ഥത സൃഷ്ടിക്കുന്നതാണ്. കേരള വസ്ത്രമായ മുണ്ട് ധരിച്ചതിന് വിദ്യാർഥികളിൽ ഒരാൾ പരിഹസിക്കപ്പെടുകയും ആക്രമിക്കപ്പെടുകയും ചെയ്തുവെന്ന വിവരവും ഞെട്ടലുണ്ടാക്കുന്നതാണ് - എം പി കത്തിൽ പറഞ്ഞു.