പരിഷ്കരിച്ച ജിഎസ്‌ടി നിരക്കുകള്‍ നിലവിൽ വന്നു.

22/9/25

ന്യൂഡൽഹി: പരിഷ്കരിച്ച ജിഎസ്‌ടി നിരക്കുകള്‍ നിലവിൽ വന്നു. 5, 12, 18, 28 ശതമാനം എന്നിങ്ങനെ നാല്‌ സ്ലാബുകളായിരുന്ന നികുതി ഘടനയിൽ ഇന്നുമുതൽ അഞ്ച്‌ ശതമാനം, 18 ശതമാനം സ്ലാബുകൾ മാത്രമേ ഉണ്ടാകു. മറ്റ്‌ സ്ലാബുകളുണ്ടായിരുന്ന ഉൽപ്പന്നങ്ങളെ ഇ‍ൗ രണ്ടുസ്ലാബുകളിലേയ്‌ക്ക്‌ ഉൾപ്പെടുത്തി. അവശ്യവസ്തുക്കൾ, ഭക്ഷ്യധാന്യങ്ങൾ, മരുന്നുകൾ തുടങ്ങി ഭൂരിഭാഗം സാധനങ്ങളും അഞ്ചുശതമാനം സ്ലാബിലാണ്‌. അതേസമയം പുകയില, പാൻ മസാല, മുന്‍നിര വാഹനങ്ങൾ തുടങ്ങിയവ ഉൾപ്പെടുത്തി 40 ശതമാനത്തിന്റെ പ്രത്യേക നിരക്കും പ്രഖ്യാപിച്ചിട്ടുണ്ട്. 2017ൽ ജിഎസ്‌ടി നിലവിൽവന്ന്‌ മൂന്നു മാസത്തിനുശേഷം ഇരുന്നൂറിലേറെ ഉൽപ്പന്നങ്ങളുടെ നിരക്ക്‌ 28ൽനിന്ന്‌ 18 ശതമാനമായി കുറച്ചിരുന്നു. എന്നാൽ ഇതിന്റെ ഗുണം ഉപഭോക്താക്കൾക്ക്‌ ലഭിച്ചില്ല. ലാഭം വിതരണക്കാരും കമ്പനികളും കൈയടക്കി. ഇപ്പോൾ കാർ, മാർബിൾ, ചിലയിനം മരുന്നുകൾ എന്നിവയുടെ വില കുറയുമെന്ന്‌ കമ്പനികൾ പ്രഖ്യാപിക്കുന്നുണ്ടെങ്കിലും എത്രത്തോളം നടപ്പാകുമെന്ന്‌ ഉറപ്പില്ല.