‘ഓരോ ശിശുരോദനത്തിനും കേള്‍പ്പു നാം ഒരുകോടി ഈശ്വരവിലാപം’; സഭയിൽ രാഹുലിനെ പരോക്ഷമായി വിമർശിച്ച് ഭരണപക്ഷം

17/9/25

തിരുവനന്തപുരം∙ ആരോഗ്യരംഗത്ത് ഉയരുന്ന പ്രശ്‌നങ്ങളുമായി ബന്ധപ്പെട്ട ചർച്ചയിൽ രാഹുല്‍ മാങ്കൂട്ടത്തില്‍ വിഷയം പരോക്ഷമായി ഉയര്‍ത്തി നിയമസഭയില്‍ പ്രതിരോധിച്ച് ഭരണപക്ഷം. ഒരു കുഞ്ഞിനെയും കൊല്ലുന്നതല്ല സര്‍ക്കാര്‍ നയമെന്ന രാഹുലുമായി ബന്ധപ്പെട്ട ഗര്‍ഭഛിദ്രവിവാദം പരാമര്‍ശിച്ച് ഭരണപക്ഷ എംഎല്‍എമാര്‍ പറഞ്ഞു. അമീബിക് മസ്തിഷ്‌ക ജ്വരം ബാധിച്ചുള്ള മരണനിരക്ക് കേരളത്തില്‍ കുറവാണെന്ന് ടി.ഐ.മധുസൂതനന്‍ എംഎല്‍എ പറഞ്ഞു. ആരോഗ്യമന്ത്രിയെ വ്യക്തിപരമായി വേട്ടയാടാന്‍ ശ്രമിക്കുകയാണ്. കുഞ്ഞുങ്ങളെ കൊല്ലാന്‍ ചിലര്‍ ശ്രമിക്കുമ്പോള്‍ കുഞ്ഞുങ്ങളെ ചേര്‍ത്തുപിടിക്കുന്ന നയമാണ് ഇടതു സര്‍ക്കാരിന്റേതെന്നും മധുസൂതനന്‍ പറഞ്ഞു. ‘ഓരോ ശിശുരോദനത്തിനും കേള്‍പ്പു നാം ഒരുകോടി ഈശ്വരവിലാപം’ എന്ന കവിതയും അദ്ദേഹം ഉദ്ധരിച്ചു.