ജന്മാഷ്ടമിക്ക് ഒരുങ്ങി ഗുരുവായൂർ; മുതിർന്ന പൗരന്മാർക്കും ഭിന്നശേഷിക്കാർക്കും അടക്കം പ്രത്യേക സൗകര്യം

13/9/25

ഗുരുവായൂർ ∙ നാളെ അഷ്ടമി രോഹിണി ആഘോഷത്തിന് ഒരുക്കങ്ങൾ പൂർത്തിയായിരിക്കെ ഗുരുവായൂർ ക്ഷേത്രത്തിൽ ദർശനത്തിന് ഇന്നു വൻ തിരക്ക്. ഇന്നും പൊതുഅവധിയായതിനാൽ രാവിലെ മുതൽ വലിയ തിരക്കാണ്. നാളെ പരമാവധി ഭക്തർക്കു ദർശന സൗകര്യമൊരുക്കാൻ ക്രമീകരണമുണ്ട്. വിഐപി, സ്പെഷൽ ദർശനങ്ങളുണ്ടാവില്ല. വരി നിൽക്കുന്ന ഭക്തർക്ക് കൊടിമരത്തിനു സമീപത്തുകൂടി നേരിട്ട് നാലമ്പലത്തിലെത്തി ദർശനം ന‌‌ടത്താം. നാളെ പ്രദക്ഷിണവും ശയന പ്രദക്ഷിണവും അനുവദിക്കില്ല. മുതിർന്ന പൗരന്മാർക്ക് രാവിലെ 5.30 മുതൽ 6.30 വരെയും വൈകിട്ട് 5 മുതൽ 6 വരെയും പ്രത്യേക ദർശന സൗകര്യമുണ്ട്. ചോറൂണ് കഴിഞ്ഞ കുട്ടികൾക്കും രക്ഷിതാക്കൾക്കും ഭിന്നശേഷിക്കാർക്കും ഗർഭിണികൾക്കും സുഗമ ദർശനം ഉറപ്പാക്കിയിട്ടുണ്ട്.