‘ഇന്ദ്രിയ’വും ‘ലോക’യും ഒരേ യൂണിവേഴ്സ് ആണോ?; ‘നിഷാന്ത് സാഗർ’ റഫറൻസ് കണ്ടെത്തി പ്രേക്ഷകർ

കല്യാണി പ്രിയദർശൻ സൂപ്പർ ഹീറോയായി അഭിനയിച്ച 'ലോക'യിൽ നിഷാന്ത് സാഗറിനെ അഭിനയിപ്പിക്കാനുണ്ടായ ‘കാരണം’ കണ്ടെത്തി ആരാധകർ. നിഷാന്ത് സാഗർ മുൻപ് അഭിനയിച്ച സിനിമയുടെ റഫറൻസ് ചൂണ്ടിക്കാട്ടിയാണ് ആരാധകരുടെ രസകരമായ കണ്ടെത്തൽ. വാണി വിശ്വനാഥിനെ നായികയാക്കി 2000ൽ പുറത്തിറങ്ങിയ ‘ഇന്ദ്രിയം’ എന്ന ചിത്രത്തിൽ നിഷാന്ത് സാഗർ അഭിനയിച്ചിരുന്നു. ചിത്രത്തിൽ മരത്തിൽ ആണി അടിച്ചു തറച്ചിരുന്ന നീലി എന്ന യക്ഷിയെ മോചിപ്പിച്ചത് നിഷാന്ത് സാഗർ അവതരിപ്പിച്ച ‘സണ്ണി’ എന്ന കഥാപാത്രമായിരുന്നു. ‘ലോക’യിൽ നീലി എന്ന യക്ഷിയുടെ മോഡേൺ പതിപ്പാണ് കല്യാണിയുടെ ചന്ദ്ര. വർഷങ്ങൾക്കു മുൻപ് ‘ഇന്ദ്രിയം’ സിനിമയിൽ നീലിയെ മോചിപ്പിച്ച കഥാപാത്രം ചെയ്തതുകൊണ്ടാണ് ഇപ്പോൾ ലോകയിൽ നീലിക്ക് നിർദേശങ്ങൾ നൽകുന്ന കഥാപാത്രമായി നിഷാന്ത് സാഗർ എത്തുന്നത് എന്നാണ് ആരാധകരുടെ പുതിയ കണ്ടെത്തൽ. ‘ലോക’യിൽ നീലിയുടെ കാമുകനെ അവതരിപ്പിക്കുന്ന നസ്‍ലിന്റെ കഥാപാത്രത്തിന്റെ പേര് സണ്ണി എന്നതും മറ്റൊരു യാദൃച്ഛികത.