വിമര്‍ശനങ്ങള്‍ സഹിക്കാന്‍ ഒരു രാഷ്ട്രീയക്കാരന് തൊലിക്കട്ടി വേണം; ബിജെപിയെ പരിഹസിച്ച് സുപ്രീം കോടതി

9/9/25

തെലങ്കാന മുഖ്യമന്ത്രി രേവന്ത് റെഡ്ഡിക്കെതിരെ നല്‍കിയ മാനനഷ്ടക്കേസ് റദ്ദാക്കിയ ഹൈക്കോടതി വിധി ശരിവച്ച് സുപ്രീം കോടതി. പാര്‍ട്ടിക്കെതിരെ അപകീര്‍ത്തികരമായ പ്രസ്താവനകള്‍ 2024ലെ ലോക്‌സഭാ തിരഞ്ഞെടുപ്പ് സമയത്ത് നടത്തിയെന്നാരോപിച്ച് ബിജെപി തെലങ്കാന ഘടകം നല്‍കിയ അപ്പീലാണ് തള്ളിയത്. വിമര്‍ശനങ്ങള്‍ സഹിക്കാന്‍ ഒരു രാഷ്ട്രീയക്കാരന് തൊലിക്കട്ടി വേണമെന്ന് ചീഫ് ജസ്റ്റിസ് പരിഹസിച്ചു. ‘കോടതികളെ രാഷ്ട്രീയ യുദ്ധക്കളങ്ങളാക്കി മാറ്റാന്‍ കഴിയില്ലെന്ന് ഞങ്ങള്‍ പലതവണ ആവര്‍ത്തിച്ചിട്ടുണ്ട്. നിങ്ങളൊരു രാഷ്ട്രീയക്കാരനാണെങ്കില്‍, ഇതെല്ലാം സഹിക്കാനുള്ള തൊലിക്കട്ടി നിങ്ങള്‍ക്കുണ്ടായിരിക്കണം’ ഹൈക്കോടതി വിധിയെ ചോദ്യം ചെയ്തുള്ള ഹര്‍ജി തള്ളിക്കൊണ്ട് സുപ്രീംകോടതി പറഞ്ഞു. രാഷ്ട്രീയ പ്രശ്‌നങ്ങള്‍ക്കായി കോടതികളെ ഉപയോഗിക്കുന്നതിനെതിരെ ബിജെപിക്ക് കോടതി മുന്നറിയിപ്പും നല്‍കി. ചീഫ് ജസ്റ്റിസ് ബി.ആര്‍. ഗവായ്, ജസ്റ്റിസ് കെ. വിനോദ് ചന്ദ്രന്‍, ജസ്റ്റിസ് അതുല്‍ എസ്. ചന്ദൂര്‍ക്കര്‍ എന്നിവരടങ്ങിയ ബെഞ്ചാണ് ഹര്‍ജി പരിഗണിച്ചിരുന്നത്.