‘ഫൈൻ അടിക്കുന്നതിന് മുന്‍പുള്ള പ്രഹസനം’; വിഡിയോ പങ്കുവച്ച് നവ്യ, ട്രോളുമായി പിഷാരടി

8/9/25

കഴിഞ്ഞ ദിവസമാണ് മുല്ലപ്പൂവ് കൈവശം വച്ചതിന് നടി നവ്യ നായരിൽ നിന്നു ഓസ്‌ട്രേലിയയിലെ മെല്‍ബണ്‍ രാജ്യാന്തര വിമാനത്താവളം പിഴയീടാക്കിയത്. വിക്ടോറിയയിലെ മലയാളി അസോസിയേഷന്റെ ഓണപ്പരിപാടിയില്‍ പങ്കെടുക്കാനെത്തിയതായിരുന്നു നവ്യ. സംഭവം സമൂഹമാധ്യമങ്ങളിലുള്‍പ്പെടെ വൈറലായതിന് പിന്നാലെ എയര്‍പോര്‍ട്ടില്‍ നിന്നടക്കമുള്ള തന്‍റെ ദൃശ്യങ്ങള്‍ പങ്കുവച്ച് രംഗത്തെത്തിയിരിക്കുകയാണ് താരം. ‘ഫൈൻ അടിക്കുന്നതിന് തൊട്ടുമുന്‍പുള്ള പ്രഹസനം’ എന്നാണ് തമാശരൂപേണ നവ്യ പോസ്റ്റിന് ക്യാപ്ഷന്‍ നല്‍കിയിരിക്കുന്നത്. വിമാനത്താവളത്തില്‍ നിന്നു ഭക്ഷണം കഴിക്കുന്നതിന്‍റെയും ഫ്ലൈറ്റില്‍ കയറുന്നതിന്‍റെയും ഷോപ്പിങിന്‍റെയും ദൃശ്യങ്ങളാണ് നവ്യ പങ്കുവച്ചത്. ദൃശ്യങ്ങളിലും കേരള സാരിയുടുത്ത് തലയില്‍ മുല്ലപ്പൂ ചൂടിയാണ് നവ്യയുള്ളത്. ‘ഓണം മൂഡ്’ എന്ന പാട്ടുമായാണ് നവ്യ വിഡിയോ പങ്കുവച്ചത്.