മലയാളത്തിന്റെ ‘വണ്ടർ വുമൺ’, മേക്കിങ് മികവിന്റെ ‘ലോക

2/9/25

സിനിമാപ്രേമികൾ കഴിഞ്ഞ കുറെ മാസങ്ങളായി ആകാംഷയോടെ കാണാൻ കാത്തിരുന്ന ചിത്രമാണ് 'ലോക'. 'ലോക: ചാപ്റ്റർ വൺ -ചന്ദ്ര' എന്ന പേര് അണിയറപ്രവർത്തകർ പ്രഖ്യാപിച്ചപ്പോൾ തന്നെ 'ലോക' എന്ന പേരിനു പിന്നിൽ ഒരു സിനിമാറ്റിക് യൂണിവേഴ്സ് തന്നെയുണ്ട് എന്ന സൂചന ലഭിച്ചിരുന്നു. ദുൽഖർ സൽമാന്റെ വേഫെറർ ഫിലിംസ് ആണ് ചിത്രത്തിന്റെ നിർമ്മാതാവ്‌ എന്നറിഞ്ഞതോടെ പ്രേക്ഷക പ്രതീക്ഷ ഇരട്ടിയായി. ഡൊമിനിക് അരുൺ സംവിധാനം ചെയ്ത 'ലോക: ചാപ്റ്റർ വൺ -ചന്ദ്ര' ഇന്ന് തിയറ്ററിലെത്തുമ്പോൾ ആരാധകരുടെ പ്രതീക്ഷ കാത്തു എന്നുമാത്രമല്ല മലയാള സിനിമയ്ക്ക് അഭിമാനമായി ഒരു സൂപ്പർ വുമൺ ചിത്രം കൂടി സാധ്യമായിരിക്കുകയാണ്. മലയാളത്തിലെ ആദ്യത്തെ സൂപ്പർഹീറോ ചിതമായ ‘മിന്നൽമുരളി’ക്ക് ശേഷം ചെറിയ മുതൽ മുടക്കിൽ മാർവൽ സിനിമകളോട് കിടപിടിക്കാവുന്ന തരത്തിലുള്ള മറ്റൊരു സൂപ്പർ ഹീറോ സിനിമയാണ് വേഫറർ ഫിലിംസ് മലയാളത്തിന് സമ്മാനിച്ചിരിക്കുന്നത്.