ചിരഞ്ജീവിയെ കാണാൻ 300 കിലോമീറ്റർ സൈക്കിളിൽ ആരാധിക; ഹൃദ്യമായി സ്വീകരിച്ച് സൂപ്പർതാരം

30/8/25

പ്രിയതാരത്തെ കാണാൻ മുന്നൂറിലധികം കിലോമീറ്റർ സൈക്കിൾ ചവുട്ടിയെത്തിയ ആരാധികയെ ഹൃദയപൂർവം സ്വീകരിച്ച് സൂപ്പർതാരം ചിരഞ്ജീവി. ആന്ധ്രാപ്രദേശിലെ അഡോണിയിൽ നിന്ന് സൈക്കിളിലാണ് ചിരഞ്ജീവിയുടെ ആരാധിക രാജേശ്വരി ഹൈദരാബാദിലേക്ക് തിരിച്ചത്. ഏറെ ആരാധിക്കുന്ന പ്രിയതാരത്തെ നേരിൽ കാണുക എന്ന വലിയ സ്വപ്നം മാത്രമായിരുന്നു ഇതിന് രാജേശ്വരിക്ക് പ്രചോദനം. ശാരീരിക അവശതകളും പരിമിതികളും ഒക്കെ മറകടക്കാൻ രാജേശ്വരിയെ തുണച്ചത് ചിരഞ്ജീവിയോടുള്ള കടുത്ത ആരാധനയും കലർപ്പില്ലാത്ത സ്നേഹവും ആണ്. ഈ യാത്രയുടെ കഥ അറിഞ്ഞ മെഗാസ്റ്റാർ ഇരുകയ്യും നീട്ടിയാണ് രാജേശ്വരിയെ സ്വീകരിക്കാൻ ഒരുങ്ങിയത്. അതിവൈകാരികമായിരുന്നു ആ കൂടിക്കാഴ്ച. ചിരഞ്ജീവിയുടെ കയ്യിൽ രാഖി കെട്ടി സന്തോഷം അറിയിച്ച രാജേശ്വരിക്ക്, തന്റെ സ്നേഹത്തിന്റെയും ബഹുമാനത്തിന്റെയും പ്രതീകമായി ഒരു സാരിയാണ് മെഗാസ്റ്റാർ സമ്മാനം നൽകിയത്.