ക്രിമിനലിനെ എംഎല്‍എ എന്ന് പറഞ്ഞ് കെട്ടിയെഴുന്നള്ളിക്കാനുള്ള കോൺ​ഗ്രസിന്റെ നടപടി മാന്യത ഇല്ലാത്തത്: സിഐടിയു

30/8/25

തിരുവനന്തപുരം: സ്ത്രീകളെ കമ്പോള ചരക്കാക്കി കൈകാര്യം ചെയ്യുകയും, കൊല്ലാനും മടിയില്ല എന്ന് ഭീഷണിപ്പെടുത്തുകയും ചെയ്ത ക്രിമിനലിനെ എംഎല്‍എ എന്ന് പറഞ്ഞ് പാലക്കാട്ട് കെട്ടിയെഴുന്നള്ളിക്കാനുള്ള കോണ്‍ഗ്രസിന്‍റെ നടപടി മാന്യത ഇല്ലാത്തതെന്ന് സിഐടിയു. പ്രവര്‍ത്തിദൂഷ്യം തിരുത്തുന്നതിന് പകരം പരാതിപ്പെടുന്നവരെയും, അന്യായം തുറന്നുകാണിക്കുന്നവരെയും കൈകാര്യം ചെയ്യാനാണ് കോണ്‍ഗ്രസ് ശ്രമമെങ്കില്‍ തൊഴിലാളികള്‍ കയ്യുംകെട്ടിയിരിക്കില്ലെന്നും സിഐടിയു സംസ്ഥാന കമ്മിറ്റി പ്രസ്താവനയില്‍ പറഞ്ഞു. രാഹുല്‍ മാങ്കൂട്ടത്തിലിന്‍റെ പ്രസ്താവനകളും, പ്രകോപനപരമായ പ്രവൃത്തികളും ഒരു എംഎല്‍എയ്ക്ക് നിരക്കുന്നതല്ല. രാഹുല്‍ മാങ്കൂട്ടത്തിലും, ഷാഫി പറമ്പിലും, വി ഡി സതീശനും കേരള രാഷ്രീയത്തിനും സാംസ്കാരിക ഔന്ന്യത്യത്തിനും തീരാകളങ്കമാണ്. കേരളത്തിലാകെ കലാപത്തിനുള്ള ശ്രമമാണ് യൂത്ത് കോണ്‍ഗ്രസ് നടത്തിക്കൊണ്ടിരിക്കുന്നത്. കോണ്‍ഗ്രസ് നേതൃത്വം ഈ അതിരുവിട്ട കളികള്‍ അവസാനിപ്പിച്ചില്ലെങ്കില്‍ വന്‍തിരിച്ചടി നേരിടേണ്ടി വരുമെന്നും സിഐടിയു പ്രസ്താവനയിൽ അറിയിച്ചു.