മാങ്കൂട്ടത്തിലിനെതിരായ പൊലീസ് അന്വേഷണം സ്വാതന്ത്ര്യ സമരത്തിൽ പങ്കെടുത്തതിനല്ല: മന്ത്രി വി ശിവൻകുട്ടി

29/8/25

തിരുവനന്തപുരം: രാഹുൽ മാങ്കൂട്ടത്തിലുമായി ബന്ധപ്പെട്ട പോലീസ് അന്വേഷണം സ്വാതന്ത്ര്യ സമരത്തിൽ പങ്കെടുത്തതിനല്ലെന്നും രാഹുലിനെതിരെ വാർത്ത കൊടുത്തതിന് റിപ്പോർട്ടർ ടിവിയെ ആക്രമിച്ച കോൺഗ്രസ് നടപടി ഇരട്ടത്താപ്പാണെന്നും മന്ത്രി വി ശിവൻകുട്ടി പറഞ്ഞു. റിപ്പോർട്ടർ ടിവി ഓഫീസ് ആക്രമണത്തെ അപലപിച്ച മന്ത്രി, മാധ്യമസ്വാതന്ത്ര്യത്തിനു മേലുള്ള കടന്നുകയറ്റമാണ് യൂത്ത് കോൺഗ്രസിന്റെ നടപടിയെന്നും പറഞ്ഞു. മാധ്യമ പരിലാളനയിൽ മാത്രം നിലനിൽക്കുന്ന കോൺഗ്രസ് ഒരു വാർത്തയുടെ പേരിൽ ഒരു മാധ്യമ സ്ഥാപനത്തെ ആക്രമിച്ചത് അവരുടെ അസഹിഷ്ണുതയുടെ വ്യക്തമായ തെളിവാണ്. 2013ൽ ഹയർ സെക്കൻഡറി ഡയറക്ടറായിരുന്ന കേശവേന്ദ്രകുമാറിന്റെ ഓഫീസിൽ കെഎസ്‍യു പ്രവർത്തകർ കരിഓയിൽ ഒഴിച്ചത് ആരും മറന്നു കാണില്ല. കരിഓയിൽ പ്രയോഗം കോൺഗ്രസ് പോഷക സംഘടനകളുടെ ദൗർബല്യമാണ്. അതുകൊണ്ടാണ് റിപ്പോർട്ടർ ടിവി ഓഫീസിലും സമാനമായ സംഭവം നടന്നത്. കോൺഗ്രസിന്റെ ഈ നിലപാട് ബിഹാർ തെരഞ്ഞെടുപ്പ് ഘട്ടത്തിൽ ഇന്ത്യ സഖ്യത്തെ പ്രതികൂലമായി ബാധിക്കുന്നുണ്ട്. ബിജെപി ഇത്‌ വലിയ പ്രചാരണ വിഷയമാക്കുകയാണെന്നും അദ്ദേഹം പറഞ്ഞു.