കാലാവസ്ഥ നോക്കി മലേറിയ പ്രവചിക്കാം; ആരോഗ്യ രംഗത്ത് വിപ്ലവകരമായ മാറ്റത്തിന് വഴി തുറക്കും

16/8/25

ദുബായ് : കാലാവസ്ഥ വ്യതിയാനം മനസിലാക്കിയാൽ മലേറിയ വ്യാപനം മുൻകൂട്ടി അറിയാം. ഇന്ത്യൻ ഇൻസ്റ്റിറ്റ്യൂട്ട് ഓഫ് ടെക്നോളജി (ഐഐടി) മദ്രാസും യുഎഇ യൂണിവേഴ്സിറ്റിയും ചേർന്നു നടത്തിയ പഠനത്തിലാണ് മലേറിയ വ്യാപനം മുൻകൂട്ടി പ്രവചിക്കാമെന്നു കണ്ടെത്തിയത്.ഗണിത ശാസ്ത്രത്തിന്റെയും നിർമിത ബുദ്ധിയുടെയും സഹായത്തോടെയുള്ള മലേറിയ പ്രവചന സംവിധാനം രാജ്യാന്തര തലത്തിൽ ആരോഗ്യ രംഗത്ത് വിപ്ലവകരമായ മാറ്റത്തിനു വഴി തുറക്കും. കാലാവസ്ഥയുമായി ബന്ധപ്പെട്ട ഗുരുതര പ്രശ്നങ്ങൾ നേരിടുന്ന മേഖലകളിൽ മലേറിയ പൊട്ടിപ്പുറപ്പെടാനും വ്യാപിക്കാനുമള്ള സാധ്യതകളെ മുൻകൂട്ടി കണ്ടെത്താൻ കഴിയുമെന്നതാണ് പഠനത്തിന്റെ കണ്ടെത്തൽ. അർട്ടിഫിഷ്യൽ ന്യൂറൽ നെറ്റ്‌വർക്ക്, റിക്കറന്റ് ന്യൂറൽ നെറ്റ്‌വർക്ക്സ്, ഫിസിക്സ് ഇൻഫോംഡ് ന്യൂറൽ നെറ്റ്‌വർക്സ് എന്നീ എഐ സാങ്കേതിക സൗകര്യങ്ങൾ ഗവേഷണത്തിനായി ഉപയോഗിച്ചു. രോഗ വ്യാപനത്തിന്റെ അപകടം സംബന്ധിച്ചു തൽസമയ വിവരങ്ങൾ നൽകാൻ കഴിയുന്ന ഡൈനാമിക് മോഡ് ഡികംപോസിഷൻ സംവിധാനവും പഠനത്തിന്റെ ഭാഗമായി രൂപപ്പെടുത്തി. ഇതുവഴി ആരോഗ്യ വകുപ്പിന് രോഗ പ്രതിരോധ പ്രവർത്തനങ്ങൾ ഏതു തലത്തിൽ എടുക്കണമെന്നു മുൻകൂട്ടി ധാരണ ലഭിക്കും.