പലതുള്ളി പെരുവെള്ളം, വിദ്യാർഥികളുടെ നിക്ഷേപ പദ്ധതിയിൽ 11.65 കോടി രൂപ

5/8/25

കുഞ്ഞുങ്ങളിൽ ചെറുപ്പം മുതലേ സമ്പാദ്യ ശീലം വളർത്തണമെന്ന് പറയാറുണ്ട്. ഇതേ ഉദ്ദേശത്തോടെ സർക്കാർ, എയ്ഡഡ് സ്കൂളുകളിൽ നടപ്പാക്കിയിട്ടുള്ള സ്റ്റുഡന്റ് സേവിങ്സ് പദ്ധതി മികച്ച പ്രകടനം കാഴ്ചവയ്ക്കുന്നതായി റിപ്പോർട്ടുകൾ. 11.65 കോടി രൂപയാണ് സംസ്ഥാനത്തെ സ്കൂളുകളിൽ കുട്ടികൾ നിക്ഷേപിച്ചിട്ടുള്ളത്. വിദ്യാർത്ഥികളിൽ ബാങ്കിങ് പ്രവർത്തനത്തെക്കുറിച്ച് അവബോധം സൃഷ്ടിക്കുന്നതിനായി നടപ്പാക്കിയ ഈ പദ്ധതിയിൽ പോക്കറ്റ് മണി ഉൾപ്പെടെയുള്ള ചെറിയ തുകകൾ ചെലവാക്കി കളയാതെ സ്വരുക്കൂട്ടി നിക്ഷേപിക്കുകയാണിവർ. ട്രഷറി വകുപ്പും വിദ്യാഭ്യാസ വകുപ്പും ദേശീയ സമ്പാദ്യ പദ്ധതി വകുപ്പും ചേർന്നാണ് സ്കൂളുകളിൽ ഈ പദ്ധതി നടപ്പാക്കുന്നത്. 320,463 വിദ്യാർത്ഥികൾ ഇതിൽ അംഗങ്ങളാണ്. ഒന്നു മുതൽ പ്ലസ് ടു വരെയുള്ള കുട്ടികൾക്ക് ഇതിൽ അംഗമാകാം.