തെലുങ്ക് പ്രേക്ഷകരെ ഞെട്ടിച്ച് വെങ്കിയുടെ പ്രസംഗം

29/7/25

വിജയ് ദേവരക്കൊണ്ട നായകനായെത്തുന്ന ‘കിങ്ഡം’ എന്ന ചിത്രത്തിന്റെ പ്രി–റിലീസ് ഇവന്റിൽ തെലുങ്കിൽ അതിഗംഭീര പ്രസംഗം നടത്തി കയ്യടി നേടി മലയാളി താരം വെങ്കിടേഷ്. ആത്മവിശ്വാസം നിറയുന്ന വെങ്കിടേഷിന്റെ വാക്കുകളും പ്രകടനവും തെലുങ്കു പ്രേക്ഷകരുടെ മാത്രമല്ല തെന്നിന്ത്യൻ പ്രേക്ഷകരുടെ ഹൃദയം കവർന്നു. കരിയറിലെയും ജീവിതത്തിലെയും വിശേഷങ്ങൾ രസകരമായി കോർത്തിണക്കിയായിരുന്നു വെങ്കിടേഷിന്റെ വൈറൽ പ്രസംഗം. ആദ്യമായി കാരവൻ ലഭിച്ചത് ‘കിങ്ഡം’ സിനിമയുടെ സെറ്റിലാണെന്ന് വെളിപ്പെടുത്തിയ വെങ്കിടേഷ് ഇത് തന്നെ സ്വപ്നവേദിയാണെന്നും തുറന്നു പറഞ്ഞു. കൊച്ചിയിൽ അനിരുദ്ധിന്റെ സംഗീതപരിപാടിക്ക് പോകാൻ കഴിയാതെ വന്നപ്പോൾ കൂട്ടുകാരോട് വെറുതെ പറഞ്ഞ വാക്കുകൾ സത്യമായതിലുള്ള സന്തോഷവും താരം പങ്കുവച്ചു.