ദുബായുടെ പൊതുഗതാഗതം ജനങ്ങൾക്കിടയിൽ സൂപ്പർ ഹിറ്റ്.

28/7/25

ദുബായ് ∙ സ്വകാര്യ വാഹനങ്ങൾ പെരുകുമ്പോഴും ദുബായുടെ പൊതുഗതാഗതം ജനങ്ങൾക്കിടയിൽ സൂപ്പർ ഹിറ്റ്. സാധാരണക്കാർ മുതൽ വമ്പൻമാർ വരെ പൊതുഗതാഗതത്തെ ആശ്രയിക്കുന്നെന്നാണ് ആർടിഎയുടെ പുതിയ പ്രവർത്തന റിപ്പോർട്.തിരക്കേറിയ സമയങ്ങളിൽ വിചാരിച്ച സ്ഥലത്ത് എത്താൻ പൊതുഗതാഗതം തന്നെ ശരണം. സാലിക് നിരക്കുകളും പാർക്കിങ് നിരക്കുകളും വർധിപ്പിച്ചതോടെ പലരും സ്വകാര്യ വാഹനങ്ങൾ വീട്ടിലിട്ട് പൊതുഗതാഗതത്തെയാണ് ആശ്രയിക്കുന്നത്. ദുബായ് മെട്രോ, ട്രാം, ബസ്, ജലഗതാഗത വാഹനങ്ങൾ, ടാക്സികൾ, ഷെയർ വാഹനങ്ങൾ, ബസ് ഓൺ ഡിമാൻഡ് ഉൾപ്പെടെ ആർടിഎയുടെ കീഴിൽ വരുന്ന പൊതുഗതാഗത സംവിധാനങ്ങൾ ഈ വർഷം ആദ്യ ആറ് മാസങ്ങളിൽ ഉപയോഗിച്ചത് 39.53 കോടി ആളുകളാണ്. കഴിഞ്ഞ വർഷവുമായി താരതമ്യപ്പെടുത്തുമ്പോൾ 9 % വർധന.