കിണറിന് സ്ഥാനം കാണാൻ ആളെത്തി: കുഴിച്ച് ലക്ഷങ്ങൾ 'കിണറ്റിലായി'; അനുഭവം.

18/6/25

ഒരു സ്ഥാനം കാണൽ അപാരത. എന്റെ കൂട്ടുകാരനു കിണർ കുഴിക്കണം അതിനായി നല്ല സ്ഥാനക്കാരനെ തേടി അലഞ്ഞു നടക്കുന്ന സമയം. 'സ്ഥാനക്കാരിലും നല്ലതും ചീത്തയുമുണ്ടോ?' കൗതുകംകൊണ്ട് ഞാൻ ചോദിച്ചു. അവൻ പറഞ്ഞു: 'പൊന്നളിയാ എനിക്കറിയില്ല. വീട്ടുകാർക്ക് നിർബന്ധം, സ്ഥാനക്കാരനെ കൊണ്ടുവന്നുകാണിക്കണം'. ഏകദേശം ഒന്നര ഏക്കർ (150 സെന്റ് ) സ്ഥലം ഉണ്ട്. ഏരിയയിൽ അറിയപ്പെടുന്ന സ്ഥാനക്കാരനെ കൊണ്ടുവന്നു പൂവും വടിയുമൊക്കെയായി പറമ്പ് മുഴുവൻ നടന്നു കൃത്യമായി സ്ഥാനം കണ്ടു. 'ഇവിടെ കുഴിച്ചോളൂ വെള്ളം ഉറപ്പായിട്ടും കിട്ടും'.. കാശ് വാങ്ങി ആള് പോയി. കിണർ കുഴിക്കാൻ തുടങ്ങി. മണ്ണും കല്ലും പാറയുമൊക്കെയായി ഏതാണ്ട് 10-12 മീറ്റർ താഴ്ത്തി. ഒരു ലക്ഷം രൂപയോളം ചെലവായി..വെള്ളം കിട്ടിയില്ല.. വിശ്വാസികളായ ബന്ധുമിത്രാതികൾ പറഞ്ഞു: സ്ഥാനക്കാരൻ അത്ര പോരാ..നമുക്ക് വേറെ ആളെ കൊണ്ടുവന്നു കാണിക്കാം. ആദ്യം വന്നതിലും പ്രഗത്ഭനായ അടുത്തയാൾ വന്നു. മുൻപ് വന്ന സ്ഥാനക്കാരന്റെ പോരായ്മകൾ നിരത്തി വടിയും കുടയുമായി പറമ്പ് മുഴുവൻ നടന്നു വേറെ സ്ഥാനം കണ്ടു.. പണി തുടങ്ങി ലക്ഷങ്ങൾ വീണ്ടും ചെലവായി വെള്ളമില്ല.